Արևմտահայերեն
Русский
EnglishՆյու Յորքում կայանալու է «Դու ի՞նչ ես անում Արցախի համար» համերգը
«Հայերն այսօր»–ը տեղեկացրել էր, որ ՀԲԸՄ-ի Արգենտինայի մասնաճյուղը միացել է ՀՀ սփյուռքի նախարարության «Դու ի՞նչ ես անում Արցախի համար» համահայկական շարժմանը:
Այդ շրջանակներում հունիսի 14-ին ՀԲԸՄ-ի Արգենտինայի մասնաճյուղի նախաձեռնությամբ Նյու Յորքում տեղի է ունենալու համերգային ծրագիր: «Հայերն այսօր»–ի փոխանցմամբ՝ երաժշտական կատարումներով հանդես են գալու ջութակահար Սամի Մերդինյանը, դաշնակահար Հայկ Արսենյանը և օպերային երգչուհի Սոլանժ Մերդինյանը: Գոյացած ողջ հասույթն ուղղվելու է Արցախի երաժշտական դպրոցների համար երաժշտական գործիքներ գնելուն:
Համերգները, որոնց նպատակը նաև Արցախը օտարազգիների մոտ ճանաչելի դարձնելն է, արդեն կայացել են Արգենտինայի մի շարք քաղաքներում, նախատեսվում է համերգներ կազմակերպել Բրազիլիայում և Չիլիում: Հարավային Ամերիկայում իրականացվող միջոցառումներն ամփոփվելու են Հայաստանում և Արցախում՝ սեպտեմբեր ամսին:
Համերգների գեղարվեստական ղեկավար է նշանակվել արգենտինաբնակ երաժիշտ, ՀԲԸՄ-ի Արգենտինայի մասնաճյուղի պատվավոր անդամ Գագիկ Գասպարյանը, իսկ ընդհանուր պատասխանատու՝ ՀԲԸՄ կենտրոնական վարչության պատվավոր անդամ, ՀԲԸՄ-ի Արգենտինայի մասնաճյուղի փոխատենապետ Անտոնիո Սարաֆյանը:
