ՀՀ սփյուռքի նախարար Հրանուշ Հակոբյանն ընդունեց Արցախի Հանրապետության սահմանադրության նախագծի վերաբերյալ հանրաքվեին դիտորդական առաքելությամբ մասնակցելու նպատակով Հայաստանում գտնվող Արգենտինայի խորհրդարանի պատգամավոր, Քաղաքացիական ռադիկալ միության անդամ Բրենդա Օստինին և Արգենտինայի հայկական համագումարի ներկայացուցիչ Նիկոլաս Սաբունջյանին:

Ջերմորեն ողջունելով հյուրերին` նախարարը կարևորեց հեռավոր Արգենտինայի պատվիրակության մասնակցությունը ազատ, ինքնիշխան, ժողովրդավարական Արցախի պետականության կայացման գործընթացին: Նա նշեց, որ այցելելով Արցախ և անձամբ տեսնելով, առնչվելով ստեղծագործ, ազատատենչ ու տաղանդավոր ժողովրդին, նրանք կհամոզվեն, որ իրենց հողի վրա հազարամյակներ ապրող ու արարող ժողովուրդը ընդամենը իրացրել է իր ինքնորոշման իրավունքը: «Ուրախ եմ, որ դուք` դիտորդներդ ներկա եք գտնվելու ժողովրդի կամքի արտահայտմանը: Դուք կվայելեք Արցախի հրաշալի բնությունն ու ղարաբաղցու բացառիկ հյուրասիրությունը: Կտեսնեք, որ միջազգային ընդունված կանոններին համապատասխան, ձեր անմիջական մասնակցությամբ ինչպիսի արդար ու թափանցիկ հանրաքվե է իրականացվելու, ինչպիսի բարձր իրավագիտակցություն ունեցող ժողովուրդ է ապրում Արցախում»,- հավելեց նախարարը:

Նա նշեց, որ Արգենտինայի և Հայաստանի հարաբերությունները շատ սերտ ու բարեկամական են. «Մենք շատ հեռու ենք Արգենտինայից, բայց 120 հազար «դեսպան» ունենք` հրաշալի և կայացած հայկական համայնք, որը ակտիվորեն է մասնակցում համազգային ձեռնարկներին, ի դեմս Էդուարդո Էռնեկյանի, նաև նպաստում են Հայաստանի տնտեսության զարգացմանը:

Բրենդա Օստինը շնորհակալություն հայտնեց ջերմ ընդունելության համար և նշեց, որ իր կուսակցության կողմից առաջադրված նախագահն է, որ առաջին անգամ Արգենտինայում արտասանել է Հայոց ցեղասպանություն եզրույթը և օրինակ ծառայել ուրիշների համար, ինչպես նաև ճանաչել է Հայաստանի Առաջին Հանրապետությունը: «Իսկ այսօր, վստահ եմ, որ մենք կկատարենք մեր Առաքելությունը` Արցախում ճանաչելով և հարգելով մարդու իրավունքները»:

Նախարարը ևս վստահություն հայտնեց, որ տարբեր երկրների և միջազգային կառույցների մասնակցությունը Լեռնային Ղարաբաղի սահմանադրական բարեփոխման գործընթացին, կլինի ևս մեկ քայլ դեպի Հանրապետության միջազգային ճանաչումն ու Արցախյան հիմնախնդրի խաղաղ հանգուցալուծումը: