ԱՄՆ նախագահի թեկնածուները պետք է արտահայտեն իրենց հստակ դիրքորոշումը Հայոց ցեղասպանության վերաբերյալ: Ինչպես հաղորդում է «Արմենպրես»-ը, այս մասին հայտարարել է անկախ հետազոտող, Զորյան ինստիտուտի ցեղասպանություն եւ մարդու իրավունքների համալսարանական ծրագրի անդամ եւ Ցեղասպանագիտություն միջազգային ամսագրի նախկին խմբագիր Սամուել Տոտենը Զորյան ինստիտուտի պաշտոնական կայքին տված հարցազրույցում:

«ԱՄՆ-ն տասնամյակներ շարունակ խուսափել է Հայոց ցեղասպանության ճանաչուﬕց եւ շարունակում է դա անել՝ ելնելով քաղաքական նպատակահարմարությունից: ԱՄՆ-ի նման դիրքորոշումը ուղղիղ հակառակն է Գերմանիայի օրինակին: Հունիսի 2-ին Գերմանիայի խորհրդարանը ոչ միայն ընդունեց իր իսկ ազգի ներգրավվածությունը 1915 թվականի դեպքերին, այլեւ անվանեց մարդկության այս ողբերգությունն իր անունով՝ ցեղասպանություն: Բունդեսթագի քվեարկությունը պետք է ծառայի որպես վառ օրինակ մյուս ազգերի համար, որոնք դեռեւս նույն դիրքորոշուﬓ ունեն, ինչ ԱՄՆ-ն»,-ասել է նա:

Ցեղասպանագետի խոսքով՝ ԱՄՆ այժմյան կառավարությունը պետք է օրինակ վերցնի անցյալից: «Այն կարող է որդեգրել արժեքներ իր նախնիներից, մասնավորապես, դեռեւս ցեղասպանության տարիներին Օսմանյան Թուրքիայում ԱՄՆ դեսպան Հենրի Մորգենթաուից, ով տեղեկացրել էր այդ ժամանակ ԱՄՆ պետքարտուղար Ռոբերտ Լանսինգին հայերի սպանդի մասին: Այդ ժամանակներից ի վեր Մորգենթաուն եւ ԱՄՆ կառավարությունը սկսեցին աշխատանքներ տանել տարբեր ուղղություններով: Երկրորդ համաշխարհային պատերազﬕց հետո այդ մեծածավալ ջանքերն ուղղված էին ﬕլիոնների հասնող դրամահավաքների կազմակերպմանը եւ դրանց տրամադրմանը կարիքավորներին:

Այլ խոսքերով՝ ԱՄՆ կառավարությունը եւ աﬔրիկացիները հրաժարվում էին լինել հայերի բնաջնջման կողﬓակիցները: Նրանք հրաժարվում էին հերքել այդ պատմական իրողությունը»,-նշել է նա: Սամուել Տոտենի կարծիքով՝ ԱՄՆ այժմյան դիրքորոշման պատճառը թերեւս Թուրքիայի ճնշումներին տուրք տալն է:

«Հայոց ցեղասպանության ճանաչումը այժմ արդեն ԱՄՆ-ի համար պարզապես բարոյական հարց չէ, այլ երկրի արժանահավատության: Ինչպես կարող է ԱՄՆ-ն դատապարտել այլ երկրներում իրականացվող մարդու իրավունքների խախտումները, կիրառել պատժաﬕջոցներ, երբ այն չի կարող ազնվորեն առերեսվել անվիճելի պատմական փաստին: Նախագահ Օբամայի համար ուշ չէ փրկել իր համբավը եւ արժանահավատությունը երկրի հանդեպ՝ միջազգայնորեն ճանաչելով Հայոց ցեղասպանությունը: Սա է ճիշտ ժամանակը»,-ընդգծել է Սամուել Տոտենը: