Հուլիսի 12-ին ՀՀ սփյուռքի նախարարության «Սփյուռք» ամառային դպրոց  ծրագրի «Հայոց լեզվի և պատմության ուսուցիչների, կրթական գործի կազմակերպիչների վերապատրաստում» դասընթացի մասնակիցներն այցելեցին «Էդիթ Պրինտ» հրատարակչատուն, որտեղ մանրամասն ծանոթացան հրատարակչատան գործունեությանը և հրատարակվող գրքերին:

«Հայերն այսօրի» հետ զրույցում ՀՀ սփյուռի նախարարության համահայկական ծրագրերի վարչության գիտակրթական ծրագրերի բաժնի պետ Սիրվարդ Համբարյանը նշեց, որ Սփյուռքի նախարարությունը մեծ կարևորություն է տալիս՝ «Սփյուռք» ամառային դպրոցի ուսուցիչների վերապատրաստման դասընթացի մասնակիցներին ծանոթացնելու հայաստանյան այն բոլոր հրատարակչությունների գրքերին, որոնց հրատարակած ուսումնական գրքերը, օժանդակ նյութերը, տարբեր զրուցարանները, քարտեզները, ալբոմները,  Հայաստանի պետական խորհրդանշանների փաթեթները ստեղծված են հատկապես Սփյուռքին տրամադրելու համար:

Սփյուռքահայ ուսուցիչները, կրթական գործի կազմակերպիչները մեծ ոգևորությամբ շրջեցին հրատարակչատանը: Նրանց ողջ ընթացքում ուղեկցեց և հրատարակչատան ու հրատարակվող գրքերի մասին ծանոթություններ փոխանցեց Հայ հրատարակիչների միության նախագահ և «Էդիթ Պրինտ» հրատարակչության նախագահ Մկրտիչ Կարապետյանը:

Լուսինե Գրիգորյան

«Սփյուռք» ամառային դպրոց ծրագրի կամավոր, ԵՊՀ պատմության ֆակուլտետի սփյուռքագիտության ամբիոնի ուսանող