Վատիկանի Սուրբ Պետրոս տաճարին մէջ տեղի ունեցաւ Հայոց ցեղասպանութեան 100-րդ տարելիցին նուիրուած պատարագ: Քարոզին մէջ Հռոմի Ֆրանչիսկոս Պապը արտասանեց ցեղասպանութիւն բառը` Հայոց Մեծ Եղեռնը համարելով 20-րդ դարու առաջին ցեղասպանութիւնը:  Այնուհետեւ խօսեցաւ այլ ցեղասպանութիւններու մասին` նշելով Ռուանտան:

Հռոմի պապը ողջունեց  պատարագին ներկայ ՀՀ նախագահ Սերժ Սարգսեանը, Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը, Մեծի Տանն Կիլիկիոյ Արամ Ա Կաթողիկոսը եւ Հայ Կաթողիկէ պատրիարք-կաթողիկոս Ներսէս ԺԹ-ը:

Ան խօսեցաւ նաեւ հայերու մշակութային ժառանգութեան մասին` նշելով երաժշտութեան, ճարտարապետութեան եւ այլ ոլորտներու մէջ հայ ժողովուրդի ձգած անջնջելի հետքը:

Պատարագի ընթացքին կատարուեցաւ Սուրբ Գրիգոր Նարեկացիի վարդապետացման կարգը: Հնչեց լատիներէն բանաձեւը եւ Նարեկացին հռչակուեցաւ Տիեզերական եկեղեցւոյ վարդապետ: