Հայոց ցեղասպանութեան 100-րդ տարելիցը յիշատակելու համար Կլենտէյլի մէջ գործող Վահան եւ Անոյշ Շամլեան հայկական դպրոցի առաջին եւ ութերորդ դասարանցիները 100 հատ անմոռուկ  ցանած են La Crescenta-ի այգիին մէջ, tert.am-ի փոխանցմամբ, կը գրէ glendalenewspress.com-ը:

Դպրոցի աշակերտական խորհուրդի նախագահ 13-ամեայ Արա Եակուբեան նշած է, որ ութերորդ դասարանի աշակերտները կը ցանկային միանալ առաջին դասարանցիներուն ծաղիկներ ցանելու, որպէսզի տարիքով փոքր աշակերտները կարենան տեսնել, թէ ինչպէս  ծաղիկները կ’աճին ժամանակի ընթացքին:

Դպրոցի ութերորդ դասարանի աշակերտները նաեւ կը պատրաստուին յաջորդ շաբաթ Հայաստան մեկնիլ:

Արա Եակուբեան յայտնած է, որ Հայաստան այցելած է  փոքր տարիքին, ան կը յուսայ, որ այս տարուան իր այցը բոլորովին նոր փորձառութիւն կ’ըլլայ` յատկապէս հայկական մշակոյթը իւրացնելէ եւ Ցեղասպանութեան 100-րդ տարիլիցին դպրոցը աւարտելէ յետոյ:

Ծաղիկներ ցանելու արարողութեան մասնակցած է նաեւ դպրոցի տնօրէն Թալին Քարկոտորեան:

Բացի այդ, երեքշաբթի օրը Շամլեան դպրոցի  խումբ մը ծնողներ յայտնած են, որ կը պատրաստուին մօտ 4.800 քիլոմեթր ճանապարհ անցնիլ` վազելով եւ հեծանիւով մարաթոն կազմակերպելով Լոս Անճելըսէն մինչեւ  Ուաշինկթըն:

Անոնք կը պատրաստուին սկսիլ մարաթօնը Լոս Անճելըսի մէջ Ապրիլ 24-ին եւ կը  նախատեսեն մայրաքաղաք հասնիլ Մայիս 7-ին: Իրենց ճանապարհին անոնք յոյս ունին իրազեկել Հայոց ցեղասպանութեան եւ աշխարհի մէջ տեղի ունեցած այլ ցեղասպանութիւններու մասին:

Այս մարաթօնի գաղափարը յառաջացած է Միքայէլ Մարգարեանի մօտ, որ ոգեշնչուած է Ցեղասպանութիւնը յիշատակելու համար ամէն տարի դպրոցի կազմակերպած երթով, երբ ծնողներն ու աշակերտները Շամլեան դպրոցէն կ’երթան  Սուրբ Մարիամ հայ առաքելական եկեղեցի: