ՀՀ սփիւռքի նախարարութեան «Հայոց ցեղասպանութեան հետեւանքով միլիոնաւոր մանուկներ լոյս աշխարհ չեկան» համահայկական շարժումը  օրէ օր մեծ հնչեղութիւն կը ստանայ թէ՛ Հայաստանի, թէ՛ Սփիւռքի մէջ: Շարժման մասնակից դարձան նաեւ Արմաւիրի մարզի Ջանֆիտայի Է.Դաշտոյեանի անուան միջնակարգ դպրոցի աշակերտները: Անոնք լուսանկարուած են Մայր Արաքսի ափին, որ մեծ խորհուրդ կը պարունակէ իր մէջ. գաղթի ճանապարհին հայերուն սպաննելով կամ կենդանի վիճակի մէջ` վայրագ թուրքերը գետի վրայով երկարող կամուրջէն  կը նետէին Արաքս գետ: Շատ յաճախ հէնց գաղթեալները երեխաներուն հետ ճարահատեալ կը նետուէին գետ` վերջ տալով  չարչարանքներուն: Այս ամէնուն վկան էր Մայր Արաքսը, քանի որ ակամայ իր գիրկը կ’առնէր գլխակորոյս զաւակները: Գրականութեան մէջ կը նշուի, որ գարնան գետը  պղտոր  վարարած է, եւ այնքա՜ն շատ դիակ  լեցուած եղած է ջուրին մէջ, որ ամբողջութեամբ արիւն   հոսած է: Որքա՜ն տառապանք, որքա՜ն ցաւ ու պահանջ կայ  հոգիիդ մէջ, Արա՛քս: Եւ հիմա 21-րդ դարու սերունդը,  ափերուդ  հայու խրոխտ ոգով կանգնած, քեզի հետ միասին յիշելով եւ պահանջելով  կը գոչէ` «Հայոց ցեղասպանութեան հետեւանքով միլիոնաւոր մանուկներ լոյս աշխարհ չեկան»…

Ինչպէս տեղեկացուցած էինք, վերջերս ծրագիրին մասնակցեցան  նաեւ Հալէպի ազգային-դպրոցներու (Սահակեան, Կիւլպէնկեան, Հայկազեան, Զաւարեան եւ Ազգային մանկապարտէզ) աշակերտները: Երեխաներու թիւը կը հասնի աւելի  քան 700-ի: Անոնց լուսանկարները եւս ազդեցիկ են եւ յուզիչ. հալէպահայ երեխաները  լուսանկարուած են Տէր Զօրի Սրբոց Նահատակաց եկեղեցւոյ ներքնայարկը պատկերող պաստառի  ետնանկարով:

Յ.Գ.-յիշեցնենք, որ մինչեւ այժմ շարժման մասնակցած է շուրջ 6500 երեխայ` աշխարհի 13 երկրէ:

Երեխաներուն այս պաստառը  ձեռքին պահած պէտք է լուսանկարել Հայոց ցեղասպանութիւնը յիշեցնող յուշակոթողի կամ նկարի մօտ, ապա լուսանկարը ուղարկել hayernaysor@gmail.com ելեկտրոնային հասցէով: