Երուսաղէմի հայկական թողամասի պահպանութեան նուիրուած Save the ArQ նախաձեռնութեան կողմէ Շիքակոյի մէջ կազմակերպուած դրամահաւաք-ձեռնարկին աճուրդի հանուած են Երուսաղէմցի լուսանկարիչ, Հայոց ցեղասպանութիւնը վերապրած Էլիա Կահուեճեանի աշխատանքները:

«Արմէնփրէս»-ի հաղորդմամբ` աճուրդին ներկայացուած լուսանկարները եղած են յայտնի լուսանկարիչի 3 հազար աշխատանքներէ բաղկացած հաւաքածուէն: Ատոնց մէկ մասը նուիրաբերուած էր մեծանուն լուսանկարիչի որդիին ` Գէորդ Կահուեճեանի կողմէ:

«Այս ձեռնարկը  յիշեցուց մեզի, որ հայկական ինքնութիւնը կապուած չէ միայն մեր համայնքի կամ Հայաստանի հետ, այն կը նշանակէ ըլլալ վերազգային մշակութային միութեան  մասը մը: Եւ Երուսաղէմի հայկական համայնքը ատոր  մէկ մասնիկն է, իրականութեան մէջ` շատ կարեւոր մասնիկը: Հայերը Երուսաղէմի մէջ ապրած են 1500 տարիէ աւելի եւ կը շարունակեն կարեւոր դեր խաղալ քաղաքին մէջ: Բոլոր հայերը պէտք է հպարտ ըլլան այդ ժառանգութեան համար: Եւ իբրեւ հայեր,  քրիստոնեաներ` մենք պէտք է ուղիներ գտնենք այս կամ այն կերպ մեզ նուիրելու Երուսաղէմի հայկական թաղամասի պահպանման եւ վերականգման գործին»,- նշած է ձեռնարկին մասնակիցներէն փրոֆէսոր Ռէյչել Գոշգարեան:

Երուսաղէմցի հայ յայտնի լուսանկարիչ Էլիա Կահուեճեան ծնած է 1910 թուականին, Ուրֆա քաղաքին մէջ: Հայոց ցեղասպանութեան ժամանակ սպաննուած են փոքրիկ Էլիայի ծնողները եւ որբուկին փրկած է Մերձաւոր Արեւելքի նպաստամատոյցը եւ տեղաւորած Նազարէթի հայկական  որբանոցին մէջ: Երուսաղէմի որբանոց ուղարկուելէ ետք  Կահուեճեան խոր հետաքրքրութիւն  կը ցուցաբերէ լուսանկարչութեան հանդէպ: Տարիներուն ընթացքին իւրօրինակ արուեստագիտական ոճ կը զարգացնէ, որուն շնորհիւ ալ կը դառնայ Բրիտանական հովանաւորութեան տակ գտնուող Պաղեստինի ամենակարեւոր լուսանկարիչը:

Կահուեճեանի առանձնայատկութիւնը կը կայանայ Պաղեստինի առօրեայ կեանքի սրտառուչ պահերը որսալու կարողութեան մէջ: