Օգոստոս 22-24 ՀՀ սփիւռքի նախարարութեան, Թեհրանի Հայոց թեմի թեմական խորհուրդի, Թեհրանի Փերիոյ կրթասիրաց միութեան նախաձեռնութեամբ Երեւանի մէջ կ’իրականացուին Իրանի Փերիոյ գաւառի հայութեան օրեր:

Օգոստոս 22-ին, ժամը 14.00-ին Երեւանի Մեսրոպ Մաշտոցի անուան Մատենադարանին մէջ տեղի կ’ունենայ Իրանի Փերիոյ գաւառի հայութեան վերաբերող ձեռագիրներու ցուցահանդէսի բացման արարողութիւն: Ողջոյնի խօսքով հանդէս կու գայ ՀՀ սփիւռքի նախարար Հրանոյշ Յակոբեան: Կ’ընթերցուի ՀՀ-ի մէջ ԻԻՀ դեսպան Մոհամմատ Ռէյիսիի, Թեհրանի հայոց թեմի առաջնորդ Տ. Սեպուհ արք. Սարգսեանի, ԻԻՀ խորհրդարանին մէջ հայազգի ներկայ եւ նախկին պատգամաւորներու, Թեհրանի Փերիոյ կրթասիրաց միութեան ողջոյնի ուղերձը:

Կը ցուցադրուի «Իրանի Փերիա գաւառի հայկական գիւղեր» խորագիրով Ֆիլմը` նուիրուած վաստակաշատ ուսուցիչ, բանասէր Լեւոն Գ. Մինասեանի յիշատակին:

Փերիա գաւառի ձեռագիրները կը ներկայացնէ Մ. Մաշտոցի անուան Մատենադարանի ձեռագրագիտութեան եւ մայր ցուցակի բաժինի վարիչ, գլխաւոր աւանդապահ Գէորգ Տէր-Վարդանեան:

Կը կազմակերպուի այց ձեռագրատուն` տեսնելու Փերիա գաւառի ձեռագիրները:

Օգոստոս 23-ին, ժամը 11.00-ին ծրագիրի մասնակիցները կ’այցելեն Ծիծեռնակաբերդի համալիր, Ցեղասպանութեան թանգարան, կը հանդիպին ցեղասպանութեան թանգարանի տնօրէն Հ. Դեմոյեանի հետ,կը զրուցեն Ցեղասպանութեան 100-րդ տարելիցին նուիրուած ծրագիրներու շուրջ:

Օգոստոս 24-ին, ժամը 10:00-ին Մայր Աթոռ Սբ. Էջմիածինի մէջ կը մատուցուի Սբ. պատարագ, Փերիոյ գաւառի ննջեցեալներու Հոգեհանգիստի արարողութիւն:

Օգոստոս 24-ին, ժամը 19:00-ին «Արամ Խաչատրեան» համերգասրահին մէջ տեղի կ’ունենայ «Սայաթ-Նովա» աշուղական համոյթի համերգը Թովմաս Պօղոսեանի ղեկավարութեամբ: Կը կատարուին փերիահայ աշուղներու ստեղծագործութիւնները:

Ներկաներուն կ’ողջունեն ՀՀ սփիւռքի նախարար Հրանոյշ Յակոբեան, ՀՀ-ի մէջ ԻԻՀ դեսպան Մոհամմատ Ռէյիսին, Թեհրանի հայոց թեմի առաջնորդ Սեպուհ արք. Սարգսեան: