Պոլսահայ յայտնի լուսանկարիչ Արա Կիւլերը Սթամպուլի Պողազիչի համալսարանի կողմէ արժանացած է «Պատուոյ Դոկտորի» կոչման:

Ալբերտ Լոնկ Հոլլ սրահին մէջ տեղի ունեցած հանդիսաւոր ձեռնարկին ժամանակ Պողազիչի համալսարանի տնօրէն Կիւլա Պարպարոսօղլուն «Պատուոյ դոկտորի» կոչման հաւաստագիրը անձամբ յանձնած է  անուանի արուեստագէտին:

Տնօրէնը իր խօսքին մէջ նշած է, որ Կիւլերին այս կոչումը կը շնորհուի Թուրքիքյ պատմութիւնն ու առօրեան  աշխարհին ներկայացնելու համար:

Թրքական «Մանշէթ թիվի» լրատուական կայքի հաղորդմամբ` հանդիսաւոր արարողութեան մասնակցած է նաեւ Նոպելեան մրցանակակիր թուրք գրող Օրհան Փամուքը, որն իր խօսքին մէջ նշած է, թէ հեշտ է մեծանուն նկարիչին պարգեւատրելը, սակայն ամենակարեւորը անոր գործերու արխիւի պահպանութիւնն է:

Կը հաղորդուի, որ Կիւլերի աշխատանքները պիտի ցուցդրուին Պողազիչի համալսարանին մէջ ամբողջ յուլիս ամսուան ընթացքին:

Ermenihaber.am