Կը շարունակենք մեր ընթերցողներուն  ներկայացնել  Հայաստան  ժամանած  սփիւռքի  երիտասարդներու  տպաւորութիւնները  «Արի  տուն» ծրագիրին  մասին:  Այս  անգամ  կ’անդրադառնանք  ԱՄՆ-ի  Օհայօ նահանգէն  եկած  Արմէն Թովմասեանին, Թիֆլիսի  մասնակիցներէն  Ջուլիետա  Յարութիւնեանին  եւ  Պետրոս Սաֆարեանին:

  Արմէնին  «Արի  Տուն»   բերած է  հայրիկին կանչը.

 «Հայրս աշխատանքի բերումով Հայաստան կը գտնուի, շրջապատէն լսած է ծրագիրին մասին, զանգահարեց ինծի, տեղեակ պահեց, ես ալ ընդհանրապէս չէի եկած Հայաստան, մտածեցի` ճիշդ ժամանակն է երթալ տեսնելու հայրենիքս, շատ  կ’ուզէի ծանօթանալ հայրենակիցներուս հետ, կատարելագործել հայերէնս,-ըսաւ Արմէնը:- Գալով Հայաստան` հասկցայ, որ գեղեցիկ երկիր ունիմ, բնութիւնը  շատ սիրեցի,  լեռները, յատկապէս  լեռներու մաքուր օդը եւ սառնորակ ջուրերը»:

 Այցելած բոլոր վայրերն ալ հաւնած է Արմէնը եւ յիշած է, թէ ինչպէս  ծնողները իրեն պատմած են այդ բոլոր պատմամշակութային վայրերուն մասին: Միայն քիչ մը դժգոհ է այստեղի երթեւեկութենէն, անկանոն կը վարեն վարորդները, ինչ որ չես տեսներ ԱՄՆ-ի փողոցներուն մէջ:

Հայերու հիւրընկալ ըլլալու մասին հետեւեալը կը  պատմէ. «Երբ հիւր կ’երթանք, հնարաւոր չէ, որ մեզի համար սեղան չբանան` հայկական տարբեր ուտեստներով, որոնցմէ առաւել շատ սիրած եմ քապապը (հիացական բացականչութիւններ ընելով-հեղ. ), բանջարեղէններէն սիրեցի լօլիկն ու վարունգը, քանի որ երբ կը կտրատես,  հոտը քիթիդ կը հասնի, իսկ այնտեղ այսպէս բան չկայ. ամէն ինչ քիմիայէն է: Վերադառնալով ԱՄՆ`  Արմէնը պիտի շարունակէ ուսումը, որոշած է հմտանալ ծրագրաւորողի մասնագիտութեան մէջ, կ’ըսէ` գուցէ այնպէս ստացուի, որ տեղափոխուի` Հայաստան ուսումը շարունակելու, իսկ եթէ ոչ, իր ուժերու չափով լաւ մասնագէտ դառնալու պարագային ամէն  ինչ պիտի ընէ  Հայաստանին  օգնելու  համար:

  Թիֆլիսաբնակ Ջուլիետայի  համար  նոյնպէս օրերը ուրախ եւ հետաքրքիր կ’ացնին հայրենիքին մէջ: Յատկապէս կարեւոր կը համարէ այն հանգամանքը, որ նոր ընկերներ  ձեռք բերած է տարբեր երկիրներէ, որոնց հետ հաճոյքով կը շփուի: Ընկերներով արդէն պայմանաւորուած են` յառաջիկայ կիրակի օրը  շրջին Երեւանով եւ լաւ ժամանակ անցնեն: Ջուլիետան հիւրընկալող ընտանիքին մասին իւրայատուկ սիրով կը խօսի, աղջկայ հաւաստմամբ` իրեն ջերմ վերաբերմունքի  արժանացուցած են, տան հասակակիցին հետ մերուած է արդէն, միասին տարբեր խաղեր կը խաղան: Հայկական խորովածը  շատ կը սիրէ, որն արդէն հիւրասիրած  են իրեն  հիւրընկալող  ընտանիքը:

Իսկ  Պետրոսը  շատոնց իրազեկուած է  ՀՀ  սփիւռքի նախարարութեան նախաձեռնած «Արի  տուն»   ծրագիրի մասին, սակայն չէր յարմարիր մասնակցութիւնը նախորդ տարիներուն: Ընկերները պատմած են, թէ ինչ լաւ ուսուցողական ծրագիր է, որքան յագեցած ու հետաքրքրիր կ’անցնին օրերը: Այս տարի ալ որոշած է մասնակցելու եւ անձամբ զգալու ընկերներու պատմածը:

Չնայած ամէն տարի ամրան Պետրոսը   Հայաստան կու գայ` հանգիստի, շրջագայութեան  նպատակով, սակայն վայրեր կային, որ չէր այցելած, տպաւորուած  է  Էջմիածինով  եւ  Մատենադարանով:

  Պատրաստեց  Գէորգ  Չիչեան