Սիրելի հայրենակիցներ, Հայաստանի եւ Սփիւռքի մէջ մեծ ոգեւորութեամբ տեղեկացան ԱՄՆ ծերակոյտի արտաքին յարաբերութիւններու յանձնաժողովին կողմէ Հայոց ցեղասպանութիւնը դատապարտող 410 բանաձեւի ընդունման մասին: Մենք կ’ողջունենք Հայոց ցեղասպանութեան 100-րդ տարելիցին ընդառաջ այս բանաձեւի ընդունումը, որ եւս մէկ անգամ կ’ապացուցէ, որ մարդկութեան դէմ ուղղուած յանցագործութիւնները չունին վաղեմութեան ժամկէտ:

Այս քայլով Ծերակոյտի արտաքին յարաբերութիւններու յանձնաժողովի նախագահ Ռոպերթ Մենենտեսը եւ բանաձեւին կողմ քուէարկած ծերակուտականները հաստատեցին համամարդկային արժէքներուն հաւատարիմ մնալու եւ մարդկութեան դէմ ուղղուած յանցագործութիւնները կանխարգելելու իրենց պատրաստակամութիւնը:

Հայոց ցեղասպանութեան ճանաչման եւ դատապարտման գործընթացքին նման բանաձեւի ընդունումը կարեւոր քայլ մըն է, որ իրականացուցած է ԱՄՆ-ի հայկական սփիւռքի, հայկական համագումարի, Ամերիկայի  եւ աշխարհի տարբեր երկիրներու մէջ գործող Հայ Դատի գրասենեակներու եւ համահայկական այլ կառոյցներու նպատակային եւ անխոնջ ջանքերուն շնորհիւ:

Կը մաղթեմ ձեզ ուժ եւ կորով Հայոց ցեղասպանութեան համընդհանուր ճանաչման, դատապարտման եւ հետեւանքներու վերացման ուղղուած ձեր ջանքերուն:

ՀՀ սփիւռքի նախարարի պաշտօնակատար
Հրանուշ Յակոբեան