Արամ Ա. կաթողիկոսի կողմէ Կիրակի առաւօտ Լաթաքիա ղրկուած, միաբան հայրերէ բաղկացած պատուիրակութիւնը վերադարձաւ Անթիլիաս եւ զեկուցեց իր կատարած առաքելութեան մասին:

Պատուիրակութեան զեկոյցին համաձայն շուրջ երկու հազար հայեր հեռացած են Քեսապէն եւ ապաստանած Լաթաքիոյ եկեղեցիէն ու դպրոցէն ներս. իսկ ոմանք իրենց հարազտներուն մօտ: Համայնքային պատասխանատու մարմիններ մօտէն կը հետեւին ու օգտակար կ’ըլլան մեր ժողովուրդի զաւակներու սննդական ու առողջապահական կարիքներուն: Նաեւ օգտակար կ’ըլլան միջազգային կարմիր խաչի եւ սուրիոյ կարմիր մահիկի մարմինները:

Լաթաքիայ ուղղուած պատուիրակութեան անդամները Կիրակի առաւօտ պատարագած են ու Նորին Սրբութեան մտահոգութիւնն ու զօրակցութիւնը փոխանցած մեր ժողովուրդն զաւակներուն: Ապա անոնք հանդիպումներ ունեցած են եկեղեցական ու համայնքային պատասխանատու մարմիններուն հետ ու մօտէն շփում հաստատած մեր ժողովուրդի զաւակներուն հետ:

Յայտնենք որ Վեհափառ Հայրապետը մօտէն կը հետեւի Լաթաքիոյ ու Քեսապի կացութեան: Մնայուն կապի մէջ է պատասխանատուներուն հետ եւ անհրաժեշտութեան պարագային Կաթողիկոսարանի Տեղեկատուական գրասենեակը հարկ եղած տեղեկութիւնները պիտի փոխանցէ մեր ժողովուրդի զաւակներուն:

Այս մասին կը հաղորդէ Կիլիկիոյ կաթողիկոսութիւնը: