«Մէկ Գիրք. Մէկ Կլենտէյլ» ծրագիրը Հինգշաբթի, Փետրուար 27ին բեմահարթակ հանդիսացաւ Քրիս Պոհճալեանի Հայկական Ցեղասպանութեան նուիրուած «Աւազէ Ամրոցի Աղջիկները» («The Sandcastle Girls») վէպի քննարկումին:
Կլենտէյլի հանրային կեդրոնական գրադարանին մէջ կայացած հաւաքին ընթացքին հեղինակը բացատրեց, թէ հատորը գրած էր յատկապէս ոչ հայերու համար, որպէսզի անոնք եւս ծանօթանան Հայկական Ցեղասպանութեան պատմութեան: Նաեւ, վէպը առիթ մը եղած է աշխարհին ներկայացնելու իր մեծ հօր եւ մօր պատմութիւնը: Պոհճալեան տեղեկացուցած է, թէ բեմադրիչ Էրիք Նազարեան ֆիլմի պիտի վերածէ վէպը:
Պոհճալեան հեղինակ է 17 հատորներու, որոնց մէկ մասը տեղ գտած է Միացեալ Նահանգներու մէջ ամենաշատ ծախուած գիրքերու՝ «Նիւ Եորք Թայմզ»ի ցանկին վրայ:

asbarez.com