Ղարաբաղի մասին գրուած ամէն մի ճշմարտութիւն ու իրական փաստ ժխտելու մոլուցքով տարուած ատրպէյճանական պաշտօնեաներէն ու դիւանագէտներէն ոմանք երբեմն կը յայտնուին իրենց համար ոչ շահեկան իրավիճակներու մէջ` ընդհուպ մինչեւ թոյլ տալով իրենց համար ճակատագրական սխալներ: Քանի մը պարագաներու Ատրպէյճանի իշխանութիւնները, չհասկնալով իրենց արտաբերած միտքերը, անուղղակիօրէն ճանչցած են Լեռնային Ղարաբաղի հանրապետութիւնը` հաստատելով, որ այն հայկական տարածք է եւ հայկական պետութիւն: Օրերս ալ Մեծ Բրիտանիոյ մօտ Ատրպէյճանի արտակարգ եւ լիազօր դեսպանը այնպիսի յայտարարութիւն ըրած է, որմով Ատրպէյճանն ու Լեռնային Ղարաբաղը տարազատուելով, կը համարուին տարբեր պետութիւններ…

The Guardian պարբերականի լուսանկարիչ Անաստասիա Թէյլոր-Լինտը այցելած է Լեռնային Ղարաբաղ, ծանօթացած այս չճանչցուած պետութեան, անոր մարդկանց, ապա վերադառնալով` գրած է. «Լեռնային Ղարաբաղը` Ատրպէյճանի նախկին մէկ մասը, անկախութիւն  հռչակած է , սակայն աշխարհի ոչ մէկ երկիր չէ ճանչցած: Բայց մարդիկ այստեղ կ’ապրին, կ’ամուսնան, երեխաներ կ’ունենան…»: Այս հրապարակման անմիջապէս արձագանքած է Միացեալ Թագաւորութեան մէջ Ատրպէյճանի դեսպան Ֆահրադդին Ղուրպանովը, որ գրած է. «Արուեստի մարդիկ պիտի արուեստով զբաղուին եւ չխառնուին քաղաքական խնդիրներուն… Անաստասիա Թէյլոր-Լինտը  պարտաւոր էր նաեւ Ատրպէյճան այցելել, որպէսզի ծանօթանար հարկադրաբար փախստական դարձածներուն, որոնք վտարուած են Լեռնային Ղարաբաղի մէջ գտնուող իրենց տուներէն»:

 Անշուշտ, այս պատասխանը անարձագանք չէ մնացած, եւ Մեծ Բրիտանիոյ լորտերու պալատի անդամ պարոնուհի Քերոլայն Քոկսը անմիջապէս ներկայացուցած է փաստեր ատրպէյճանցիներու` Լեռնային Ղարաբաղի մէջ կատարած վայրագութիւններուն մասին: Սակայն դեսպանի հրապարակման մէջ ուշագրաւն այն է, որ ան լուսանկարիչին մեղադրելով «անօրինական» այցելութիւններու մէջ, այնուհանդերձ խորհուրդ կու տայ այցելել… Ատրպէյճան: Այսինքն, ատրպէյճանական իշխանութիւնները կը յայտարարեն, թէ Ղարաբաղը Ատրպէյճանի բաղկացուցիչ մասն է, չեն ընդուներ անոր անկախութիւնը, իսկ ահա դեսպանը կ’առաջարկէ այցելել Ատրպէյճան: Այս հրապարակումը կը դառնայ եւս մի ուշագրաւ խոստովանութիւն, ապացոյց, որ Ատրպէյճանը կը զբաղի սոսկ հռետորաբանութեամբ` ըստ էութեան համոզուած ըլլալով, որ Լեռնային Ղարաբաղը շատոնց ինքնուրոյն պետութիւն է, եւ վերադարձ դէպի Ատրպէյճանի «գիրկ» ` չկայ…

Լ.Մ.