Փետրուար 11-ին պոլսահայ սիրուած երգչուհի Սիպիլը (Սիպիլ Փեքթորոսօղլու) պիտի թողարկէ իր երկրորդ ձայնասկաւառակը «Սէր» (LOVE) վերտառութեամբ:

Ալպոմին մէջ ընդգրկուած են 12 երգեր, որոնցմէ 7-ը  նոր երգեր են: Ատոնցմէ 11-ը  հայերէն են, մէկը` Ma Hollema (Մինչեւ ե՞րբ), արամէրէն լեզուով:

Ձայնասկաւառակի թողարկման ընթացքին Սիպիլը համագործակցած է  յայտնի տուտուկահար Ջիւան Գասպարեանի, երգահան Արա Գէորգեանի, Անտրէի, «Արեւներ» խումբի, ինչպէս նաեւ հայաստանեան 15 յայտնի երգիչներու եւ յոյն երաժիշտ Փետրոյի հետ:

Նոր երգերու հեղինակը ճանչցուած երգահան Մաժակ Թոշիկեանն է, մէկ երգի երաժշտութիւնը գրած է Արա Գէորգեան: Իսկ խօսքերը հեղինակած են Մաքրուհի Յակոբեանը, Աւետ Բարսեղեանը, Արթուր Սաֆարեանը:

Սկաւառակին մէջ ընդգրկուած է «Աւետեաց երկիր» երգի ռեմիքս տարբերակը, որ Սիպիլին  նուիրած է թուրք ճանչցուած երաժիշտ Մերճան Տետէն:

«Այս գիշեր» երգի հիման վրայ նկարահանուած է տեսահոլովակ, որ շուտով եթեր կը հեռարձակուի:

«Ալպոմիս անունը ցանկացայ «Սէր» կոչել, քանի որ աշխարհի ամենաուժեղ զգացումն է սէրը. սիրոյ մասին շատ երգեր, շատ պատմութիւններ գրուած են: Ես ալպոմս մէկ անձի համար «Սէր» չկոչեցի: Ցանկացայ, որ այն սէր բերէ բոլոր մարդոց` անկախ մաշկի գոյնէն, կրօնէն եւ ազգային պատկանելութենէն»,- «Հայերն այսօրի» թղթակիցին ըսած է Սիպիլը:

Շնորհաւորենք Սիպիլին ու մաղթենք, որ ալպոմին մէջ ընգգրուած երգերը սէր բերեն բոլոր մարդոց, իսկ այդ սիրոյ արձանգանքները «հնչեն» սիրուած երգչուհիի հոգիին:

Յիշեցնենք, որ 2011 թուականին պոլսահայ երգչուհի Սիպիլի հայերէն «Նամակ» երգի տեսահոլովակը մեծ աղմուկ բարձրացուց եւ ցուցադրուեցաւ Թուրքիոյ առաջատար հեռուստաընկերութիւններով: Առաջին անգամ ըլլալով` Թուրքիոյ հեռուստաընկերութիւններով հնչեց հայկական երգ:

Իսկ նոյն տարուան օգոստոս 13-ին առաջին անգամ սթամպուլահայ երգչուհի Սիպիլ Փեքթորոսօղլուի  գեղեցիկ կատարումը հնչեց արդէն  Հայաստանի մէջ:

Սիպիլի հետ «Հայերն այսօր»-ի հարցազրոյցը` յառաջիկայ օրերուն…