Ինչպէս «Հայերն այսօր»-ին կը տեղեկացնէ  Հոլանտայի մէջ մեր կայքի թղթակիցը, յունուար 19-ին Ալմելոյի Հայ Առաքելական եկեղեցւոյ Գալուստ Կիւլպէնկեան սրահին մէջ հիւրընկալուած էին Հայաստանէն ժամանած երեխաներ`  թիւով 20 հոգի, որոնցմէ 15-ը`  Գիւմրիի անապահով ընտանիքներէն,  եւ 5-ը`  Վանաձորի մանկատան երեխաներ են:

Երեխաները իրենց ձմեռնային արձակուրդները կ’իրականացնեն Հոլանտանի մէջ յունուար 7-էն մինչեւ փետրուար 2`  Pax  kinderhulp    կազմակերպութեան ֆինանսաւորման եւ օժանդակութեան շնորհիւ:

Հանդիպումը երեխաներուն հետ կազմակերպած էին Ս.Գրիգոր Լուսաւորիչ եկեղեցւոյ վարչութիւնը, Հայ մարմնակրթական ընդհանուր միութիւնը (ՀՄԸՄ) եւ Հայկական բարեգործական ընդհանուր միութիւնը (ՀԲԸՄ):

Սկիզբը երեխաները ներկայ գտնուեցան կիրակնօրեայ սբ.  Պատարագին, որմէ ետք տեղի ունեցաւ համերգ`  հոլանտահայ երգիչ-երաժիշտներու մասնակցութեամբ:

Երեխաները հնարաւորութիւն ունեցան ծանօթանալու եւ  ընկերանալու իրենց հասակակից հոլանտահայ երեխաներու հետ:

Հանդիպումը աւարտեց ճաշկերոյթով, որուն ընթացքին երեխաները ստացան բազմաթիւ նուէրներ:

Ներկայիս Հոլանտայի մէջ կը  գտնուին 40  հայաստանցի երեխաներ,  որոնցմէ 20-ը Վարդենիսի մօտակայ  գիւղերէն  են:

Մանուկ Մկրտչեան

Ալմելօ, Հոլանտա