Յունիս 9-ին, 10-ին եւ 16-ին Սան Փաուլօ քաղաքի Ներգաղթի թանգարանի նախաձեռնութեամբ տեղի  ունեցած է Festa do Imigrante փառատօնը, որ իր շուրջ համախմբած էր Պրազիլ ապրող 50 ազգութիւններու ներկայացուցիչներ: Փառատօնին կը մասնակցէր նաեւ Համազգային մշակութային միութեան Պրազիլի մասնաճիւղը, որ ներկայացուց հայկական մշակոյթը:

«Յունիս 9-ին փառատօնի ծիրէն ներս ցուցադրեցինք մեր հարուստ խոհանոցը` խորոված, քիւֆթա, բլղուրով փլաւ, գաթա, թահինով հաց, պրազիլցիներու ամենասիրած հայկական ճաշատեսակներէն մէկը` ձուով եւ պասթուրմայով պատառ` լաւաշի մէջ փաթթուած, եւ բազում այլ ուտեստներ, որոնք կը զարդարեն հայկական խոհանոցը»,-  «Հայերն այսօր»-ի  հետ զրոյցին նշեց Վարդինէ Կալաճեան:

Յունիս 10-ին Հայկական SAMA ակումբի երգչախումբը ներկայացուցած է հայկական երգեր` մասնակցութեամբ հայկական երգերու կատարող Վահագն Մինասեանի: Երգերը նուիրուած  եղած են Երեւանի հիմնադրման 2800-ամեակին:

Յունիս 16-ին` փառատօնի վերջին օրը, Համազգայինի երեք պարախումբերը` մանկական «Արեւիկ», երիտասարդներու «Կիլիկիա», միջին տարիքի «Ծիրանի», ներկայացուցած են հայկական ժողովրդական պարեր, որոնք մեծ խանդավառութեամբ ընդունուած են:

«Բոլորս միասին, ձեռք-ձեռքի, այլ ազգերու կողքին Հայաստանն ու հայ ժողովուրդը ներկայացուցինք իբրեւ հզօր ազգ: Մեր հպարտութեան պատճառը նաեւ այն էր, որ  մեր մշակոյթը ցուցադրեցինք  երկրի մը մէջ, որ ամէն օր գաղթականներ կ՛ընդունի»,-իր խօսքը եզրափակեց Վարդինէ Կալաճեան: