Յունիս 19-ին Թեհրանի «Չահարմահալ» միութեան Յովհաննէս Թումանեանի անուան դահլիճին մէջ տեղի ունեցաւ ԻԻՀ-ի մէջ ՀՀ դեսպանութեան կողմէ կազմակերպուած գրական-գեղարուեստական ձեռնարկ` նուիրուած իրանահայ գրող Վարանդի «Ժամանակակից պարսից պոէզիա. ակներ ակներեւ» ծաղկաքաղ-գիրքի շնորհանդէսին, որ կը պարունակէ ժամանակակից իրանական գրականութեան շուրջ 100 ստեղծագործութեան թարգմանութիւն:

Յատկանշական է, որ 2017թ. իրանահայ գրողը ժամանակակից իրանական բանաստեղծութեան նուիրուած վերոնշեալ աշխատութեամբ մասնակցած էր Հայաստանի գրողներու միութեան եւ Մայր Աթոռ Սուրբ Էջմիածնի հովանիի ներքոյ իրականացուող «Կանթեղ» մրցանակաբաշխութեան` արժանանալով թարգմանչական գլխաւոր մրցանակի:

Իր ելոյթին մէջ ԻԻՀ-ի մէջ ՀՀ արտակարգ եւ լիազօր դեսպան Արտաշէս Թումանեան, շնորհաւորելով Վարանդը եւ բարձր գնահատելով անոր կատարած աշխատանքը, յատուկ անդրադարձ կատարեց Հայաստան-Իրան յարաբերութիւններու ծիրէն ներս  միջմշակութային կապերու ամրապնդման` ընդգծելով երկու ժողովուրդներու մշակութային արժէքները իրար յաւուր պատշաճի ներկայացնելու կարեւորութիւնը:

Շնորհանդէսի ընթացքին հնչեցուած իր ելոյթին Վարանդը հանգամանօրէն ներկայացուց իր ստեղծագործութիւնը, խօսեցաւ «Կանթեղ» մրցանակաբաշխութեան եւ իրանահայ համայնքի գրական-մշակութային կեանքին առնչուող  շարք մը խնդիրներու մասին:

Ձեռնարկին  հնչեցին Վարանդի հեղինակած եւ  շարք մը այլ ստեղծագործութիւններ:

Ներկաներու շարքին էին Իրանի գրական-մշակութային ոլորտի գործիչներ, իրանահայ ազգային կառոյցներու ներկայացուցիչներ, արուեստագէտներ եւ այլ հրաւիրեալներ: