Նոր Ջուղայի Հայ կանանց գթութեան միութեան վարչութեան նախաձեռնութեամբ եւ Սպահանի Հայոց թեմի ՀՀ հիմնադրման 100-ամեակի նշման Կեդրոնական յանձնախումբի հովանաւորութեամբ մայիս 15-ին հայ դատի  յանձնախումբի կեդրոնատեղիի սրահին մէջ տեղի ունեցաւ դասախօսական երեկոյ` նուիրուած ՀՀ հիմնադրման 100-ամեակին:

Ինչպէս «Հայերն այսօր»-ին նոր Ջուղայէն կը յայտնէ Երանուշ Թահմազեանը, ներկաները ողջունեց երեկոն կազմակերպող միութեան անդամուհի Գայեանէ Եղիազարեան, որմէ յետոյ օրուան  բանախօս, վաստակաւոր ուսուցիչ, պատմաբան Վարուժ Մովսիսեանը հանդէս եկաւ«Հայկական պետականութեան ակունքներէն» թեմայով  դասախօսական ելոյթով:

Բանախօսը թեմատիկ պատկերներու զուգորդութեամբ ներկայացուց հին աշխարհի սկզբնաաղբիւրներուն մէջ` հիմնական շումերական դիւցազնավէպերուն եւ իրանական արձանագրութիւններուն մէջ տարբեր անուանումներով նշուած հայկական լեռնաշխարհի եւ հայոց պետականութեան գոյութեան մասին հետաքրքիր վկայութիւններ ու տեղեկութիւններ եւ անդրադարձաւ Սուրբ Աստուածաշունչին մէջ յիշատակուած Եդեմ-դրախտին, ուր յիշատակուած 4 գետերու ակունքը կը հանդիսանայ հայկական լեռնաշխարհը: Ապա կեդրոնացաւ 1918- թուականին ՀՀ  կերտման:

Վարուժ Մովսիսեան իր ելոյթն աւարտեց Հայաստանի առաջին հանրապետութեան ժամանակաշրջանին հայ կանանց տրուած`  ընտրելու եւ ընտրուելու նախադէպը չունեցող իրաւունքներուն մասին արտայայտութիւններով, որ կը վկայէր` Հայաստանը որպէս յառաջադէմ երկիր ըլլալու մասին:

Աւելցնենք, որ սա Կանանց գթութեան միութեան  կազմակերպած երկրորդ  ձեռնարկն էր` նուիրուած ՀՀ  հիմնադրման 100-ամեակին:

 Լուսանկարները` հեղինակին