Ռաֆայէլ Մէկալ (Մելիքեան), ՀՀ վաստակաւոր նկարիչ…

Թերեւս այս   քանի մը`  առաջին հայեացքէն ժլատ թուացող բառերով, հնարաւոր չէ ամբողջապէս նկարագրել  եւ բնութագրել Ռաֆայէլ Մէկալ (Rafael Megall) արուեստագէտը, որուն հետ կը հանդիպիմ ու կը զրուցեմ երկրորդ անգամ: Այս անգամ Ռաֆայէլը ՀՀ սփիւռքի նախարարութիւն  եկած էր  հրաշալի նորութեամբ մը` կիսուելու «Հայերն այսօր»-ի հետ: Ռաֆայէլէն տեղեկացանք, որ ան մայիս 13-ին կը պատրաստուի  Իտալիոյ Վենետիկ քաղաքի Մուրատ-Ռաֆայէլեան վարժարանին մէջ մասնակցելու ժամանակակից արուեստի 57-րդ պիենալին` ներկայացնելով իր` «Յովազներն իմ ծաղկած այգիին մէջ» շուրջ 15 նկարներու շարքը:

Այդ ցուցահանդէսին պիտի մասնակցին երեք արուեստագէտ. մէկը` Սփիւռքէն, միւսը` արտերկրէն եւ Ռաֆայէլ Մէկալը: Ցուցահանդէսին պատասխանատուն, խնամակալը` յայտնի արուեստաբան Տէմեթրիօ Փափարոնին է, հովանաւորը` ՀՀ մշակոյթի նախարարութիւնը, աջակիցները` ՀՀ սփիւռքի նախարարութիւնն ու Ազգային պատկերասրահը:

Մէկալը  նաեւ աւելցուց, որ «Յովազներն իմ ծաղկած այգիին մէջ» շարքի նկարները եղած են յատուկ այդ ցուցահանդէսին համար եւ Վենետիկի մէջ կը մնան մօտ 4-5 ամիս, որմէ ետք  կը ցուցադրուին Հայաստանի մէջ:

 Ոււրեմն, մեր երիտասարդ արուեստագէտին մաղթենք աննախադէպ յաջողութիւններ եւ նոր գործեր ստեղծելու աննահանջ վերելք: Մաղթենք, որ Մէկալը Վենետիկէն վերադառնայ  արուեստագէտի համար ամենաթանկ մրցանակով:

 Կարինէ Աւագեան