Գերմանիոյ հայ գործարարներու միութեան նախագահ Մուրատ Աքիւզը «Հայերն այսօրի» հետ զրոյցին կը ներկայացնէ միութեան կողմէ իրականացուող ծրագիրները, որոնք մեծաւմասամբ ուղղուած են Հայաստանի եւ Արցախի տարբեր ոլորտներու զարգացման: Միութեան «դիտակէտէն» չեն վրիպած նաեւ Գերմանիոյ հայ համայնքէն ներս առկայ խնդիրները:

–Պարո՛ն Աքիւզ, ե՞րբ  ստեղծուած է Գերմանիոյ հայ գործարարներու միութիւնը, ո՞րն է միութեան գործունէութեան հիմնական նպատակը:

-Տասնվեց տարի առաջ որոշեցինք ստեղծել միութիւն, որն ազգօգուտ աշխատանքներ կատարելու համար կը համախմբէր Գերմանիոյ եւ առհասարակ` օտար երկիրներու մէջ ապրող հայ գործարարներուն: Միութեան ստեղծումէն  քանի մը տարի յետոյ մարդիկ հասկցան, որ այն յոյժ կարեւոր, ժամանակի հրամայականով ստեղծուած կառոյց է:

Միութիւնը ունի «Արմէն Տէրտէրեան» հիմնադրամը, որուն շնորհիւ Հայաստանի եւ Արցախի մէջ ընկերային, կրթական, առողջապահական եւ այլ բնոյթի ծրագիրներ կ’իրականացնենք: Մեր աշխատանքին նպատակը Հայաստանին ու Արցախին օգտակար ըլլալն է:

 Ուշադրութեան կեդրոնին մէջ առողջական խնդիրներ ունեցող երեխաներու բուժման, հիւանդանոցներու, համաբուժարաններու, մանկապարտէզներու, դպրոցներու կառուցման կամ վերանորոգման հարցերն են: Բժշկական ծրագիրները կը կատարենք մեր լուսահոգի ընկերներէն մէկուն յիշատակին, որուն հետ շուրջ 20 տարի բարեկամաբար աշխատած ենք:

Անցեալին կը համագործակցէինք «Հայաստան» համահայկական հիմնադրամին հետ, այժմ, սակայն, ինքնուրոյն  ծրագիրներ կ’իրականացնենք, թէեւ հիմա ալ կը մասնակցինք հիմնադրամի ամէնամեայ դրամահաւաքին:

Տարուան կտրուածքով հաստատուած պիւտճէ ունինք, եւ միութեան վարչակազմով կը քննարկենք, թէ տուեալ գումարն ինչ նպատակի ծառայեցնել: Գումարին մէկ մասով Հայաստանի մէջ  ծրագիրներ կ’իրականացնենք, իսկ միւս մասով` Գերմանիոյ հայ համայնքին  տարբեր հարցրերով կ’օգնենք:

Բոլոր աշխատանքները կատարած ենք Գերմանիոյ մէջ ՀՀ դեսպանատան հետ համագործակցելով: Հայաստանի մէջ կը համագործակցինք նաեւ ԵՊՀ աստուածաբանութեան բաժանմունքի տնօրէն Տէր Անոյշաւան եպիսկոպոս Ժամկոչեանի հետ, որ ժամանակին Գերմանիոյ մէջ  ուսանած է: Ան մեզի համար վստահելի գործընկեր է:

Վարչութեան ատենապետին եւ փոխատենապետին հետ որոշեցինք յետագային գործերն առաջ տանելու համար նոր գաղափարներ մտածել: Իբրեւ արդիւնք Քեոլն քաղաքին մէջ վարկային պայմաններով շէնք գնեցինք, որուն սենեակները վարձով կու տանք գերմանացի 6 ընտանիքներու: Այդ շէնքը մեզի տարեկան 120.000 եւրոյի եկամուտ կը բերէ, որն ալ կ’օգնէ մեր աշխատանքները համակարգելուն:

–Հայաստան այցելութիւնը բարեգործական հերթական ծրագիրն իրականացնելու հե՞տ  կապուած էր:

-Այո՛: Մարտ 3-ին Երեւանի թիւ 1 համաբուժարանի վերանորոգուած շէնքի բացումը կատարեցինք` կեանքի կոչելով եւս  մէկ բարի գործ: Բացման արարողութեան կը մասնակցէր նաեւ ՀՀ սփիւռքի նախարար Հրանոյշ Յակոբեան:

Վերջերս փոխեցինք Արմաւիրի մարզի Փարաքար գիւղի մանկապարտէզի պատուհանները: Իբրեւ հայ մարդ` չկրցանք անտարբեր անցնիլ, թէ ինչպէս  երեխաները այդպիսի պայմաններու մէջ իրենց օրը կ’անցնէին:

–Եկէ՛ք քիչ մը առարկայական խօսինք` նշելով, թէ ուրիշ ի՞նչ ծրագիրներ  կատարած էք Հայաստանի մէջ:

–Հայաստանի մէջ առաջին ծրագիրը Աբովեան քաղաքի մէջ  իրականացուցած ենք: Տարիներ առաջ, երբ Համահայկական խաղերուն մասնակցելու համար հայ մարզիկներու խումբ մը ուղարկած էինք, անոնք Աբովեան քաղաքին մէջ ոչ բարւոք վիճակի մէջ գտնուող  մանկապարտէզ մը տեսած էին, որ վերանորոգման կարիքը ունէր: Մարզիկները մեզի տեղեակ պահեցին այդ մասին եւ այցելելով այդ մանկապարտէզ` յանձն առինք կատարելու վերանորոգման աշխատանքները:

 Պարբերաբար գերմանացի դասախօսներ, փրոֆէսորներ կ’ուղարկենք Հայաստան` ԵՊՀ տարբեր բաժանմունքներու ուսանողներուն համար դասախօսութիւններ կարդալու: Կրթաթոշակներ կը յատկացնենք հիմնականին մէջ մարզերէն ու Արցախէն երեւանեան համալսարաններուն մէջ սոցիալապէս անապահով ուսանողներուն: Մեզի համար կարեւոր է, որ անոնք ուսման վարձի պատճառով չզրկուին բարձրագոյն կրթութիւն ստանալու հնարաւորութենէն: Վերանորոգած ենք Աշտարակ քաղաքի  քանի մը դպրոցներ, ի թիւս այլ հանգանակութիւններու, գումար  յատկացուցած ենք Պեռլինի մէջ ՀՀ դեսպանատան շէնքի կառուցման նպատակով:

Կարեւոր նշանակութիւն կու տանք մշակութային ծրագիրներու իրականացման` գիտակցելով, որ Սփիւռքի մէջ ազգային մշակոյթի պահպանումն ու տարածումը ինքնութեան պահպանման նախապայմաններէն մէկն է: Մշակութային բոլոր ձեռնարկները կը կազմակերպուին Գերմանիոյ հայ գործարարներու միութեան մշակութային ծրագիրներու պատասխանատու Ալֆրանթ Պետրոսեանի գլխաւորութեամբ: Վերջինիս գործուն մասնակցութեամբ 2015 թուականին Գերմանիոյ մէջ կայացաւ Հայաստանի պարի պետական անսամպլի մենահամերգը, աշխոյժ համագործակցութիւն  սկսած է Երուսաղէմի հայ համայնքին հետ, Տիարպեքիրի Սուրբ Կիրակոս եկեղեցի յիսուն հոգինոց ուխտաւորներ  պատարագի գացած են եւ այլն:

 –Հայկական սփիւռքը միախմբուեցաւ սուրիական ճգնաժամի հետեւանքով դժուարին իրավիճակի մէջ յայտնուած սուրիահայերուն նեցուկ ըլլալու համար, կրցաւ Արցախին ապրիլեան քառօրեայ պատերազմի օրերուն կազմակերպուած օգնութիւն ցուցաբերելու:Գերմանիոյ հայ գործարարներու միութիւնը այս ուղղութեամբ ի՞նչ քայլեր  նախաձեռնած է:

-Մենք 20 հազար եւրօ գումար ուղարկեցինք Սուրիա` սուրիահայերուն առաջին անհրաժեշտութեան աջակցութիւն ցուցաբերելու համար: Այս հարցով կապ հաստատեցինք Դամասկոսի Հայոց թեմի առաջնորդ Տէր Արմաշ եպիսկոպոս Նալպանտեանի հետ: Կը ցաւիմ, որ սուրիահայ երբեմնի ծաղկուն համայնքը մասնատուեցաւ, իսկ մեր հայրենակիցները ստիպուած լքեցին իրենց տուները:

Արձագանքեցինք նաեւ Ապրիլեան քառօրեայ պատերազմի ահասարսուռ օրերուն` մեծ յուզմունքով հետեւելով, թէ ինչ կը կատարուի Հայաստանի եւ Արցախի մէջ:

Այնուհետեւ Գերմանիոյ Շտապ օգնութեան մարմնին հետ անմիջապէս քննարկում կազմակերպեցինք եւ որոշեցինք յետագայ ընելիքները: Եւ որպէսզի օժանդակութիւնը նպատակային ըլլար, բանակցեցանք Արցախի իշխանութիւններուն հետ եւ եզրահանգման եկանք 1000 հատ քնապարկ ուղարկել: Նշեմ նաեւ, որ Քառօրեայ պատերազմին վիրաւորուած  զինուոր մը ՀՀ կառավարութեան ծախսերով բուժման նպատակով այժմ մայրիկին հետ Գերմանիա կը գտնուի: Իմանալով այդ մասին` մենք պարբերաբար կ’այցելենք անոր եւ անհրաժեշտ օգնութիւն կը ցուցաբերենք:

–Պարո՛ն Աքիւզ, ե՞րբ  առաջին անգամ այցելած էք Արցախ:

-Արցախ առաջին անգամ ԵՊՀ Արեւելագիտութեան բաժանմունքի տնօրէն, գնդապետ, լեզուաբան, արեւելագէտ, բանասիրական գիտութիւններու թեկնածու, փրոֆէսոր Գուրգէն Մելիքեանի հետ գացած եմ: Մինչեւ մեր հանդիպումը անոր լաւ չէի ճանչնար: Պարզապէս գիտէի, որ Արցախ բարերարներ կ’ուղեկցէր` մասնակցութիւն ունենալով արցախցիներուն տարբեր օգնութիւններ տրամադրելու գործին: Միշտ հիացմունքով  կը նայէի Գուրգէն Մելիքեանի կատարած աշխատանքին եւ յանձին անոր`վստահելի գործընկերոջ տեսայ: Մինչեւ հիմա մեր կապը կը  պահպանուի, տարբեր խումբեր կը տանինք Արցախ:

Վստահաբար պիտի շարունակենք աշխատիլ Հայաստան-Արցախ-Սփիւռք եռամիասնութեան կապերու ամրապնդման ուղղութեամբ: Հայաստանի համար ամէն ինչ լաւ պիտի ըլլայ, այդ լոյսը կը տեսնեմ, պարզապէս ժողովուրդը պէտք է քիչ մը համբերէ: Մէկս միւսին օգնելով` պէտք է առաջ ընթանանք եւ կառուցենք մեր երկրի ապագան:

–Պարո՛ն Աքիւզ, հանդիպեցաք նաեւ ՀՀ սփիւռքի նախարար Հրանոյշ Յակոբեանին:Ին՞չ թեմաներու շուրջ քննարկում ծաւալեցիք:

-Արդիւնաւէտ հանդիպում ունեցանք ՀՀ սփիւռքի նախարար Հրանոյշ Յակոբեանի հետ: Հանդիպման կը մասնակցէր նաեւ Գերմանիոյ հայ գործարարներու միութեան մշակութային ծրագիրներու պատասխանատու Ալֆրանթ Պետրոսեանը: Մենք ներկայացուցիք միութեան կողմէ իրականացուած աշխատանքները, իսկ Հրանոյշ Յակոբեան խօսեցաւ Հայաստան-Սփիւռք գործակցութեան մասին` յորդորելով սերտացնել նախարարութեան հետ համագործակցութիւնը:

Նկատելի է, որ ՀՀ սփիւռքի նախարարութիւնը բաւականին աշխոյժ կ’աշխատի Սփիւռքի համախմբման, Հայաստանի տնտեսութեան մէջ մեր հայրենակիցներու ներդրումները խթանելու, հայրենասիրական ոգին բարձր պահելու ուղղութեամբ:

Գովելի եւ այնչափ կարեւոր է ՀՀ սփիւռքի նախարարութեան «Արի տուն» հայրենաճանաչութեան ծրագիրը: Սփիւռքահայ երիտասարդները մասնակցելով այս ծրագիրին` կրնան պահպանել Հայաստանի հետ կապը եւ չկտրուիլ իրենց արմատներէն: Գերմանաբնակ տղաներուն ու աղջիկներուն պարբերաբար կ’ուղարկենք «Արի տուն»:

Հարցազրոյցը Գէորգ Չիչեանի