Փետրուար 18–ին Իրաքի մայրաղաքաք Պաղտատի մէջ  տեղի ունեցաւ ձեռնարկ` նուիրուած Հայոց բանակի կազմաւորման 25-ամեակին: Այս մասին «Հայերն այսօր»-ին կը  յայտնեն ԱԳՆ մամուլի ծառայութենէն:

Այդ առթիւ Պաղտատի Սուրբ Կարապետ եկեղեցւոյ մէջ Հոգեշնորհ Տէր Պետրոս աբեղայ Ազարեանի գլխաւորութեամբ մատուցուեցաւ Սուրբ պատարագ:

Այնուհետեւ, տեղի ունեցաւ տօնական ձեռնարկ, որուն մասնակցեցան Իրաքի մէջ ՀՀ դեսպան Կարէն Գրիգորեան, այլ դիւանագէտներ, հայ համայնքի ներկայացուցիչներ:

Շնորհաւորելով ներկաները` Իրաքի մէջ ՀՀ դեսպան Կարէն Գրիգորեան նշեց, որ հայ զինուորականը այսօր ոչ միայն ամուր կը պաշտպանէ մեր սահմանները, այլեւ իր նպաստը կը բերէ միջազգային խաղաղութեան ապահովման` այդ կերպ բարձրացնելով ՀՀ հեղինակութիւնը միջազգային հարթակի վրայ:

Դեսպանը նաեւ աւելցուց, որ ՀՀ զինուած ուժերը, ունենալով մասնագիտական բարձր պատրաստուածութիւն, կարգապահութիւն եւ հայրենիքի նկատմամբ մեծ նուիրում, կրնան իրականացնել իրենց առջեւ դրուած բոլոր խնդիրները:

Ձեռնարկին  ընթացքին հայրենասիրական երգերու եւ ասմունքի կատարմամբ հանդէս եկան համայնքային երգչախումբը, համայնքային կառոյցներու ներկայացուցիչները եւ հայկական վարժարանի սաները: