Ռուսաստանի հայերու միութեան Խոստա քաղաքի տարածաշրջանային բաժանմունքի նախագահի տեղակալ, գործարար Վալերի Մուրադեան եւ համայնքի ներկայացուցիչ Մարկոս Քեսեան Ամանորի եւ Սուրբ Ծնունդի նախաշեմին կրկին Հայաստան  եկած էին:

Խոստայի մեր հայրենակիցները աւանդաբար կ’այցելեն Տաւուշի մարզի սահմանամերձ Չինարի միջնակարգ դպրոցի աշակերտներուն` ամանորեայ նուէրներ յանձնելու եւ ամենակարեւորն ըսելու, որ միշտ անոնց կողքին են:

Դեկտեմբեր 29-ին անոնք Չինարի գիւղ  մեկնած են` տօնական 100 նուէրներ յանձնելու աշակերտներուն: Բացի ամանորեայ նուէրներէն, առաջին դասարանցիներուն տուած են 11 բջջային հեռախօս, իսկ 11-րդ դասարանի աշակերտներուն, անոնց դասղեկին եւ Չինարի գիւղապետ Սամուէլ Սաղոյեանին յանձնած են 13 ուղեգիր` 2017 թուականի ամառնային հանգիստը Խոստայի մէջ անցնելու համար:

Տօնական ձեռնարկին օրհնութեան խօսքով  հանդէս եկած է Տաւուշի մարզի  Բերդ քաղաքի եւ Բերդի տարածաշրջանի հոգեւոր հովիւ Տէր Արամ քահանայ Միրզոյեան, ներկայ  եղած են Չինարի գիւղապետը, ուսուցիչները, գիւղի բնակիչները եւ այլ հիւրեր:

«Չինարցիներուն կողմէ ջերմ ընդունելութեան արժանացանք: Ամանորեայ հանդէսը տեղի  ունեցած է   գիւղի հրապարակին վրայ, ուր հաւաքուած  էին շուրջ 300 մարդ: Ազգային երգ ու պարի ուղեկցութեամբ, բարձր տրամադրութեամբ` միասին նշեցինք Ամանորը, իսկ Ձմեռ պապի «պարտականութիւններ»-ը այս տարի նոյնպէս Վալերի Մուրադեանը ստանձնեց»,-«Հայերն այսօր»-ի հետ զրոյցին ըսաւ Մարկոս Քեսեան` վստահեցնելով, որ նման նախաձեռնութիւններ անպայման շարունակական բնոյթ  պիտի կրեն:

Մարկոս Քեսեան տեղեկացուց նաեւ, որ Սոչիի հայ համայնքի ղեկավար Հմայեակ Ուստեանի գլխաւորութեամբ եւ Չինարի գիւղապետ Սամուէլ Սաղոյեանի հետ քննարկումներու արդիւնքով կ’որոշեն`  ինչ անհրաժեշտ պարագաներ ընտրել, որմէ յետոյ կը սկսին նուէրներու պատրաստման աշխատանքները իրականացնել:

Վալերի Մուրադեան, անդրադառնալով այս նախաձեռնութեան, «Հայերն այսօր»-ի հետ զրոյցին ըսաւ, որ ապրելով Հայաստանէն հեռու` կը մտածեն Հայրենիքին օգտակար ըլլալու մասին եւ կը փորձեն միշտ աջակցութիւն ցուցաբերել: Եւ իբրեւ ամանորեայ բարեմաղթանք` ցանկացաւ` ամէն բացուող առաւօտ Հայաստանի համար խաղաղ ըլլայ, իսկ մարդիկ` բարեկեցիկ կեանքով ապրին:

Գէորգ Չիչեան