Աշխատանքային այցով Ֆրանսայի մէջ գտնուող ՀՀ սփիւռքի նախարար Հրանոյշ Յակոբեան Նոյեմբեր 28-ին այցելած է Ալֆորվիլի «Սբ Մեսրոպ» հայկական կրթօճախ: Հրանոյշ Յակոբեան Ֆրանսայի մէջ ՀՀ դեսպան Վիգէն Չիտեչեանի հետ շրջայց  կատարած է կրթօճախին մէջ, հանդիպած ուսուցչական կազմին եւ աշակերտներուն հետ:

Ինչպէս «Հայերն այսօր»-ին կը յայտնեն Ֆրանսայի մէջ ՀՀ դեսպանատունէն՝  Շրջայցէն յետոյ տնօրինութեան հետ հանդիպման ընթացքին քննարկուած են կրթօճախի եւ նախարարութեան համագործակցութեան ուղղութիւնները, մասնաւորապէս` ուսուցիչներու վերապատրաստման, կրթօճախի գրադարարանը նախարարութեան օժանդակութեամբ հարստացնելու եւ աշակերտներու խումբերու` Հայաստան այցելութեան կազմակերպման հարցեր:

Ալֆորվիլի «Սբ Մեսրոպ» հայկական կրթօճախի նոր մասնաշէնքի բացման արարողութիւնը տեղի  ունեցած է 2015 թուականին Հայաստանի եւ Ֆրանսայի վարչապետներու գլխաւորութեամբ: ՀՀ վարչապետ Յովիկ Աբրահամեանի գլխաւորած պատուիրակութեան կազմին մէջ բացման ձեռնարկին մասնակցած է նաեւ ՀՀ սփիւռքի նախարար Հրանոյշ Յակոբեան: