Նոյեմբեր 28-ին Ֆրանսա կատարած աշխատանքային այցի ծիրէն ներս ՀՀ սփիւռքի նախարար Հրանոյշ Յակոբեան Ֆրանսայի Իլ տը Ֆրանս մարզի շրջանային խորհուրդի հրաւէրով մասնակցած է աշխատանքային նախաճաշի, որուն ներկայ  եղած է  շրջանային խորհուրդի նախագահ Վալերի Փեքրես, փոխնախագահ  Փաթրիկ Գարամը, Ֆրանսայի Հանրապետութեան մէջ Հայաստանի Հանրապետութեան արտակարգ եւ լիազօր դեսպան Վիգէն Չիտեչեան, Ֆրանսայի հայկական կազմակերպութիւնները համակարգող խորհուրդի (CCAF) համանախագահներ Մուրատ Փափազեան եւ  Արա Թորանեան: Հանդիպման ընթացքին Վալերի Փեքրեսն առաջարկած է սերտացնել համագործակցութիւնը իրենց տարածաշրջանին եւ Հայաստանի միջեւ:

«Հայերն այսօր»-ի փոխանցմամբ` նոյն օրը երեկոյեան Հրանոյշ Յակոբեան մասնակցած է  Ֆրանսայի հայկական կազմակերպութիւնները համակարգող խորհուրդի (CCAF) կազմակերպած հաւաք-քննարկման, որուն ընթացքին հանդիպման մասնակիցները իրենց յուզող հարցերը ուղղած են Հրանոյշ Յակոբեանին: ՀՀ սփիւռքի նախարարը ներկայացուցած է «Դուն ի՞նչ կ’ընես Ղարաբաղի համար» համահայկական շարժումը` կոչ ընելով մշտապէս զօրավիգ ըլլալ Արցախի ժողովուրդին եւ նպաստել Լեռնային Ղարաբաղի Հանրապետութեան միջազգային ճանաչման: ՀՀ սփիւռքի նախարար Հրանոյշ Յակոբեան հանդիպման ներկայ ֆրանսահայերուն յորդորած է նաեւ առնուազն երեք տարին  անգամ մը այցելել Հայաստան ու հանգիստը Հայրենիքի մէջ կազմակերպել: