Սուրիահայ Սայիտ Թարըք կնոջ եւ երկու տղաներուն հետ 2012 թուականին  Սուրիայէն Հայաստան տեղափոխուած է: Մասնագիտութեամբ դեղագէտ է, կրթութիւն ստացած է Երեւանի Մխիթար Հերացիի անուան պետական բժշկական համալսարանին մէջ, որ աւարտած է 2001 թուականին:

Հաստատուելով հայրենիքի մէջ` այժմ Մուրացանի մանկական հիւանդանոցի դեղատան մէջ կ’աշխատի, շատ գոհ է աշխատանքային ընկերներէն, որոնց հետ հասցուցած է բարի դրացիական յարաբերութիւններ  հաստատելու:

Հայաստանեան հասարակութեան ընդելուզուելու եւ ծանօթութիւններ հաստատելու հարցով ամուսինները խնդիրներ չեն ունեցած, քանի որ բոլորին կողմէ ջերմ ընդունելութեան արժանացած են: Եթէ հանգամանքներու բերումով, այնուամէնայնիւ, խոչընդոտներու  հանդիպած են, ատոնք ժպիտով յաղթահարած են` մտածելով, որ ամէն ինչ լաւ պիտի ըլլայ:

Խօսելով տղաներուն մասին` «Հայերն այսօր»-ի հետ զրոյցին դեղագէտը նշեց, որ անոնք միանգամէն ընտելացած են հայաստանեան կեանքին, շատ լաւ կը զգան այստեղ եւ ամէն առտու բարձր տրամադրութեամբ  դպրոց  կ’երթան:

Երեխաներու կապուածութիւնը Հայաստանին Սայիտին մտածելու տեղի  տուած է: Կը կարծէ` սուրիական ճգնաժամի աւարտէն ետք  այլեւս չեն վերադառնար Սուրիա:

Սայիտ պատմեց, որ Հայաստան հաստատուելէ ետք  ինքն ու փոքր տղան առողջական խնդիրներ  ունեցած են, որոնց ՀՀ սփիւռքի նախարարութիւնը արագ լուծում  տուած է:

«ՀՀ սփիւռքի նախարարութիւնը ամէն ինչ կ’ընէ Հայաստան հաստատուած սուրիահայերուն մօտ ծագած սոցիալական, իրաւաբանական, առողջապահական եւ միւս հարցերը կարգաւորելու համար: Մեր ընտանիքը նախարարութեան կողմէ միշտ սրտցաւ վերաբերմունքի  արժանացած է:

Հայաստան գալէ  քանի մը օր ետք չորս տարեկան տղաս Քասքատի շարժասանդուխէն ինկաւ եւ ոտքը վնասեց: Դիմելով ՀՀ սփիւռքի նախարարութիւն` մեր խնդրին անմիջապէս լուծում տուին եւ կազմակերպեցին տղուս բուժումը: Մինչեւ տղուս ապաքինուիլը` նախարարութեան աշխատակազմի ղեկավար Ֆիրդուս Զաքարեան մշտական կապի մէջ կը գտնուէր մեզի հետ: Իսկ երբ  մօտս կոնքազդրային յօդի ուռուցք յայտնաբերուեցաւ, օգնութեան խնդրանքով  անգամ մը եւս դիմեցինք ՀՀ սփիւռքի նախարարութիւն, եւ արձագանքը չուշացաւ: Նախարար Հրանոյշ Յակոբեան անձամբ հետամուտ եղաւ, որպէսզի ՀՀ առողջապահութեան նախարարութեան միջոցով իրականացուի վիրահատումն ու փրոթեզաւորումը:

«Սուրիահայերու հիմնախնդիրները համակարգող կեդրոն» ՀԿ-ի տնօրէն Լենա Հալաճեան նոյնպէս մեծ օգնութիւն  ցուցաբերած է եւ նեցուկ եղած, որպէսզի շուտ առողջանամ»,-ըսաւ Սայիտ` աւելցնելով, որ ՀՀ սփիւռքի նախարարութեան աշխատակիցներէն Հայաստան հաստատուած սուրիահայերը տեղեկատուական մեծ աջակցութիւն կը ստանան, թէ որ կազմակերպութիւններուն դիմեն` մարդասիրական օժանդակութիւն ձեռք բերելու նպատակով:

 Գէորգ Չիչեան