Մեծի Տանն Կիլիկիոյ Կաթողիկոսութեան լսատեսողական բաժանմունքի վարիչ Հոգեշնորհ Տէր Պետրոս վարդապետ Մանուէլեան կը մասնակցէր ՀՀ սփիւռքի նախարարութեան եւ Երեւանի պետական համալսարանի նախաձեռնութեամբ Օգոստոս 25-26 իրականացուած  «Հայկական աշխարհը համացանցին մէջ» միջազգային գիտաժողովին: Հայր սուրբը ներկայացուցած է «Մեծի Տանն Կիլիկիոյ կաթողիկոսութեան առաքելութիւնը համացանցի ճանապարհով» զեկուցումը:

Գիտաժողովի աշխատանքերու աւարտէն ետք «Հայերն այսօր»-ի հետ զրոյցին ան  խօսած է Մեծի Տանն Կիլիկիոյ Կաթողիկոսութեան կողմէ Սփիւռքի մէջ հայկական ինքնութեան պահպանման, հոգեւոր դաստիարակութեան նպաստող ծրագիրներուն ու ձեռնարկներուն մասին.

«Համացանցի ներկայութիւնը այսօր մեր կեանքին մէջ ամենուրէք է եւ իւրաքանչիւր  մակարդակի վրայ զգալի: Հայ ժողովուրդին համար, այսպէս կոչուած, համացանցի հարցը հրատապ  է, որովհետեւ այս  մշակոյթը ուղղակիօրէն  կ’առնչուի հայու  ինքնութեան, մարդակերտումին, հայակերտումին մեր աշխատանքներուն հետ, եւ բոլոր վայրերուն մէջ կը տեսնենք համացանցի անդրադարձը: Հայ  եկեղեցին  ոչ  միայն  հոգեւոր կեանքի կռուան է, այլեւ հայկական ինքնութեան պահպանման կարեւորագոյն դերակատարումն է յատկապէս սփիւռքեան կեանքին մէջ: Հետեւաբար, Մեծի Տանն Կիլիկիոյ Կաթողիկոսութիւնը, որպէս Սփիւռքի ազգային եւ հոգեւոր կեդրոն, հսկայական աշխատանք կատարած է ու պիտի շարունակէ կատարել ներկայ արհեստագիտութեան հարթակներուն վրայ` համաքայլ ընթանալով այսօրուան պահանջներուն:

Մեծի Տանն Կիլիկոյ Կաթողիկոսութիւնը մեծ նշանակութիւն կու տայ համացանցային գործունէութեան, որպէսզի հայութիւնը աշխուժօրէն ներկայացնենք նաեւ համացանցի միջոցով:

Կաթողիկոսութիւնը ունի իր պաշտօնական` www.armenianorthodoxchurch.org կայքը, ուր կը  լուսաբանուի  ինչպէս Ն.Ս.Օ.Տ.Տ. Արամ Ա կաթողիկոսի, այնպէս ալ` կաթողիկոսարանի ընթացիկ աշխատանքները:

Կայքի ֆէյսպուքեան էջին վրայ նաեւ օտարազգի օգտատէրեր կը հետեւին կաթողիկոսութեան գործունէութեան, ներառեալ`  թուրքերն ու ատրպէյճանցիները: Անոնք նոյնիսկ գրառումներ կը կատարեն այնտեղ:  Ասիկա կը նշանակէ, որ համացանցային դաշտին մէջ պէտք է համահայկական մօտեցում ցուցաբերենք եւ աւելի զօրեղ ըլլանք:

Մեր գործունէութեան պերճախօս վկայութիւնը այս տարուան ընթացքին Վեհափառի տնօրինութեամբ երկու կարեւոր նախաձեռնութիւններու իրականացումն էր:

Առաջինը` Յունուար ամսուն տեղի ունեցած «Ընկերային լրատուամիջոցները եւ անոնց ազդեցութիւնը հայու ինքնութեան վրայ»  թեմայով զրոյց-քննարկումն էր:

Շատ արդիւնաւէտ քննարկումներ ծաւալեցան: Մասնակից երիտասարդները իրենց մտահոգութիւնը արտայայտեցին համացանցի դրական եւ բացասական ազդեցութիւններուն վերաբերեալ:

Երկրորդ կարեւոր ձեռնարկը Յուլիսին գումարուած երիտասարդական մէկօրեայ` «Ընկերային ցանցերը եւ հայ երիտասարդները» խորագիրով համագումարն էր, որուն աշխարհի տարբեր թեմերէն շուրջ 100 հայ  երիտասարդներ մասնակցեցան: Համագումարին ժամանակ, ի թիւս այլ հարցերու, խօսուեցաւ համաշխարհայնացման այս դարաշրջանին համացանցի միջոցով հայ մնալու գաղափարին մասին»:

Գէորգ Չիչեան