Երեւանի Եղիշէ Չարենցի անուան թիւ 67 դպրոցին մէջ  Յուլիս 11-ին աւարտեցին «Արի տուն» ծրագիրի երրորդ փուլի հայոց լեզուի հնգօրեայ   դասընթացիներու իրականացումը: Ուքրանիայէն, Ռուսաստանէն եւ Լեհաստանէն ժամանած երեխաները  ամփոփելով հնգօրեայ իրենց ձեռքբերումները` ներկայացուցին   գրական-երաժշտական փոքրիկ ցերեկոյթ (ուսուցչուհի` Անի Խալաթեան):

«Հայերն այսօր»-ի փոխանցմամբ` մասնակիցները մեծ գորովանքով իրենց շրթունքներէն արտաբերեցին Տէրունական աղօթքը, ՀՀ պետական օրհներգը` «Մեր Հայրենիք»-ը, հանդէս եկան հայրենիքին եւ մայրերուն նուիրուած բանաստեղծութիւններով (Եղիշէ Չարենց, Պարոյր Սեւակ, Յովհ. Շիրազ), ազգային երգ ու պարով:

Ծրագիրի մասնակիցներու հոգիին մէջ նոր սէր արթնցաւ դէպի մայրենին, հայ գիրն ու գրականութիւնը: Երեխաները նորովի ծանօթացան հայ մեծերու կեանքին, հայ ժողովուրդի պատմութեան ու մշակոյթի պանծալի էջերուն, ուսումնասիրեցին լեզուական  քանի մը իրողութիւններ: