Արցախի վրայ սանձազերծած Ատրպէյճանի յանկարծահաս յարձակումը հայկական իրականութեան մէջ շատ  հարցեր ստիպեց վերանայիլ ու սրբագրել, բացթողումները սթափ շտկել ու ուրիշ բազում մեծ ու փոքր խնդիրներու վրայ ուշադրութիւն սեւեռել: 4-օրեայ դաժան  պատերազմի դրոշմը կնիքուեցաւ նաեւ Սփիւռքի բնականոն կեանքին վրայ, եւ շատերը իրենց հնարաւորութեան չափով ձեռք մեկնեցին Հայրենիքի ամենաթանկ հատուածին` Արցախին: Անմասն չմնացին նաեւ Հոլանտայի տարբեր քաղաքներու հայ համայնքները: Անոնք  արդէն հանդէս եկած են օգնութեան տարբեր կարգի նախաձեռնութիւններով:

Ինչպէս կը հաղորդէ «Հայերն այսօր»-ը` յղում կատարելով «Նիտերլանտական օրագրին», հիւսիսային Հոլանտայի Ալքմար, Հերհուխովարդ եւ Գասթրիկում քաղաքներու բնակիչներու նախաձեռնութեամբ ալ ստեղծուած է «Աջակցինք Արցախին» յանձնաժողովը: Նախագահ ընտրուած է Ալիսա Մովսիսեանը, որ փորձած է Հոլանտայի մէջ օգնութիւնները համակարգող  միասնական կառոյցի շուրջ  համախմբել տարբեր կազմակերպութիւններ, անոնց միաւորել  միասնական գաղափարի շուրջ: Բանակցութիւններ  վարուած են տարբեր հայկական կազմակերպութիւններու հետ, շատերը առայժմ համաձայնութիւն  յայտնած են համատեղ ծրագիրներ իրականացնել եւ իրարու օժանդակել ամենատարբեր հարցերու մէջ:

Արցախին  օգնող նորաստեղծ անձնաժողովը գործունէութեան զուգահեռ նաեւ կազմակերպչական բնոյթի աշխատանքներ կ’իրականացնէ, կ’ընթանան պաշտօնական գրանցման եւ հաշուեհամարներու բացման ընթացակարգերը: Կապ  հաստատուած է  Արցախի կառավարութեան կողմէ ստեղծուած օգնութիւնները համակարգող յանձնաժողովի նախագահ Ժիրայր Միրզոյեանի հետ, որ ողջունած է հոլանտահայերու նախաձեռնութիւնը: Օգնութեան պատրաստակամութիւն  յայտնած Հայաստանի ազգային ժողովի պատգամաւոր Անահիտ Բախշեանը: Կ’ուսումնասիրուի Հայաստանին օգնող հոլանտական միւս կազմակերպութիւններու փորձը:

Բարեգործական առաջին ձեռնարկը «Աջակցինք Արցախին» յանձնաժողովը իրականացուցած է Յունիս 19-ին: Այդ օրը հաւաքուած էին 100-է աւելի հայ համայնքի անդամներ, որոնք բարեգործութեան զուգահեռ ծանօթացան իրարու հետ, բացօթեայ խնճոյքի սեղանի շուրջ մօտէն  շփուեցան, մասնակցեցան մարզական խաղերու ու խոստացան նման ազգօգուտ հաւաքներ յաճախակի կազմակերպել:

«Աջակցինք Արցախին» յանձնաժողովի 2-րդ ձեռնարկը` Յունիս 26-ին, Գասթրիկում քաղաքի Maranatha եկեղեցւոյ հետ համատեղ: Եկեղեցին նախօրօք յուշաթերթիկ  տարածած էր, որմով յայտնած էր բարեգործական ձեռնարկին մասին` զետեղելով  Արցախի ու անոր ազատատենչ ժողովուրդի պայքարին մասին մանրամասն տեղեկութիւններ: Ուշագրաւ է, որ  անակնկալ  կերպով դրամահաւաք կազմակերպած էր  մէկ  այլ` Wittekerkje Dijk en Duin եկեղեցին:

Այդ օրը սպառած է հայ կանանց` բարեգործութեան ծիրէն ներս պատրաստուած ամբողջ համեղ քաղցրաւենիքը:

«Աջակցինք Արցախին» նորաստեղծ կազմակերպութեան ղեկավար Ալիս Մովսիսեանի խօսքով` իրենց յանձնաժողովի կազմակերպած առաջին երկու ձեռնարկները կարելի է յաջողած համարել. «Վստահ կարելի է ըսել,- կը նշէ Ա.Կիրակոսեան, որ մարդիկ ոգեւորուած են,  որ կրնան օգտակար գործ ընել Արցախի համար: օրինակ` մեր հայրենակիցներէն մէկը 1000 բացիկի տպագրութեան բոլոր ծախսերը  իր վրայ   վերցուցած էր, իսկ Ամսթերտամի «Գրիգոր Նարեկացի» դպրոցի սաները պատրաստակամութիւն   յայտնած են իրացնելու զայն»:

Առաջին օգնութիւնը Արցախ կը հասցուի Օգոստոս ամսուն: