ՀՀ սփիւռքի նախարար Հրանոյշ Յակոբեան ընդունեց Հռոմի Սրբազան Քահանայապետ Ֆրանչիսկոս Պապի այցի ծիրէն ներս Հայաստանի մէջ գտնուող Մեծի Տանն Կիլիկիոյ Կաթողիկոսութեան պատուիրակութիւնը` Բերիոյ Թեմի առաջնորդ Շահան արքեպիսկոպոս Սարգիսեանի գլխաւորութեամբ:

Սուրիահայ համայնքի հոգեւոր առաջնորդը Սփիւռքի նախարարին փոխանցեց Մեծի Տանն Կիլիկիոյ Կաթողիկոս Ն.Ս.Օ.Տ.Տ. Արամ Ա-ի օրհնութիւնն ու բարեմաղթանքները եւ նշեց, որ իրեն համար իւրաքանչիւր այցելութիւն Հայրենիքի վերելքի ու յաջողութեան հաւատքը կ’ամրապնդէ:

Կողմերը անդրադարձան Պապի այցին, զայն որակելով իբրեւ պատմական երեւոյթ, որ ամբողջ աշխարհի ուշադրութիւնը պիտի սեւեռէ Հայաստանին:

Նախարար Հրանոյշ Յակոբեան նշեց, որ Հռոմի Պապի այցը բացառիկ է իր կարգախօսով` «Ուխտագնացութիւն դէպի առաջին քրիստոնեայ երկիր» եւ աւելցուց, որ այցը առանձնայատուկ միջազգային հնչեղութիւն կ’ունենայ. քանի որ այն լուսաբանելու համար հաւատարմագրուած է 600 լրագրող:

Նախարարը խորին շնորհակալութիւն յայտնեց Սփիւռքեան կառոյցներուն ու կազմակերպութիւններուն, համայնքներուն` ապրիլեան պատերազմի օրերուն եւ ատկէ յետոյ Հայրենիքի, Արցախի կողքին ըլլալու համար, այն բարոյական ու նիւթական աջակցութեան, հոգեւոր վերազարթօնքի ու միասնականութեան համար, որ ցուցաբերեց մեր ժողովուրդը:

Կողմերը անդրադարձան Հայաստան հաստատուած սուրիահայերու հիմնախնդիրներուն, ատոնց լուծման նոր հեռանկարներուն եւ մէկ անգամ եւս շեշտուեցաւ, որ եթէ սուրիահայը կը հեռանայ երկրէն` ան պէտք է ունենայ մէկ հասցէ` Հայաստանի Հանրապետութիւն: