«Կոմիտաս Վարդապետ» փառատօնի մասնակիցները հոկտեմբեր 1-ին ուղեւորուեցան Շիրակի մարզ: Առաւօտեան մասնակիցները այցելեցին հնագոյն միջնադարեան հայկական վանքերէն մէկը` Հառիճավանք` այնտեղ, ուր հայ ազգի մեծ երգահան Կոմիտասը ծառայած եւ զբաղած է բանահաւաքութեամբ:

Այնուհետեւ Գիւմրի քաղաքի թիւ 21 «Օյունջեան» դպրոց-վարժարանի դահլիճին մէջ իրականացուեցաւ համերգային ծրագիր: Ելոյթներով հանդէս եկան Ռուսաստանի դաշնութեան Հիւսիսային Օսէթիայի Հայ Առաքելական Եկեղեցւոյ «Ս. Գրիգոր Լուսաւորիչ» կամերային երգչախումբը (գեղ. ղեկավար` Ատելինա Գրիգորեան), Ռուսաստանի Դաշնութենէն «Նորահրաշ» երգեցիկ խումբը եւ «Ովսաննա»
երգչախումբը (գեղ. ղեկավար` Ելենա Բեգլարեան), Թիֆլիսի «Հայարտուն» մշակոյթի կեդրոնի «Սուրբ Ներսէս Շնորհալի» երգչախումբը (գեղարուեստական ղեկավար` Լեւոն Չիդիլեան), Պաթումի Հայ Առաքելական «Սուրբ Փրկիչ» եկեղեցւոյ «Աղբիւր» մանկական երգչախումբը (գեղարուեստական ղեկավար` Ռուզաննա Օվանէսեան), Իրանի Թեհրան քաղաքի Արարատ կազմակերպութեան «Արարատ» երգչախումբը (գեղ. ղեկավար` Արաքս Խաչատրեան), Ճափոնէն ժամանած կոտոյահար Ասուկա Եօշիզակին եւ ջութակահար Կարէն Իսրայէլեան, գերմանիայէն` դաշնակահարուհի Սոնա Տալեան, Լիբանանէն` երգիչ Գէորգ Հաճեան, Արցախէն` երգիչ Սար Սարգսեան` դաշնակահարուհի Էմմա Առաքէլեանի նուագակցութեամբ:

Համերգէն ետք փառատօնի մասնակիցներուն համար կազմակերպուեցաւ հայկական աւանդական հիւրասիրութիւն: