«Հայերն այսօրի» այս անդրադարձը սուրիահայ Վիգէն Տողմողլեանի մասին է. վերջինս կը մասնակցէր «Նոր հեռանկարներ սուրիահայերու համար» ցուցահանդէսին:

Վիգէնը Սուրիոյ մէջ տիրող պատերազմական իրավիճակին պատճառով Հայաստան եկած է 4 տարի առաջ: Արդէն 2 տարի է, որ ընկերներուն հետ կօշիկի արտադրութեամբ կը զբաղի: Անոնք Երեւանի մէջ բացած են Ava-shoes խանութը, որ յաճախորդներուն կ’առաջարկէ բնական կաշուէ կարուած կօշիկներ` նախատեսուած կանանց, տղամարդոց եւ երեխաներու համար: Խանութը կը գտնուի Տէրեան 52 հասցէին:

Վիգէն Տողմողլեան տեղեկացուց, որ Հալէպի մէջ ընկերներով նոյնպէս նոյն աշխատանքով զբաղած են, հիմնականին մէջ ներբաններ  պատրաստած են:

Խօսելով հայաստանեան գործունէութեան մասին` ան կ’ըսէ, որ սկզբնական շրջանին դժուարութիւններու հանդիպած են, որմէ չեն վհատած: Հիմա արդէն հասած են այն արդիւնքին, որ իրենց արտադրանքը կ’արտահանեն արաբական երկիրներ, Ռուսաստան եւ Եւրոպա: Վիգէնը նկատած է, որ Հայաստանի մէջ մարդիկ շատ  նախապատուութիւն կու տան հայկական արտադրանքին, որ ալ գովելի փաստ է:

Աւելցնենք, որ «Երեւան էքսփօ» ցուցահանդէսային համալիրին մէջ  Մայիս 19-22 տեղի  ունեցած է «Նոր հեռանկարներ սուրիահայերու համար» ցուցահանդէսը, որ կ’իրականացուէր «Տնտեսական հնարաւորութիւններու շաբաթ» գործարար համաժողովի ծիրին մէջ: Ցուցահանդէսին կը մասնակցէին սուրիական պատերազմի հետեւանքով Հայաստան տեղափոխուած եւ գործարարութեամբ զբաղուող սուրիահայերու եօթանասունէ աւելի ընկերութիւններ ու անհատ ձեռնարկատէրեր:

Գէորգ Չիչեան