Հաստատուած են Յունիս 24-ին Հռոմի Քահանայապետ Ֆրանչիսկոս Պապի Հայաստանի Հանրապետութիւն այցի կարգախօսը եւ տարբերանշանը` համապատասխան նկարագրութեամբ:

Կարգախօսն է` «Այց առաջին քրիստոնեայ երկիր»:  Այս մասին կը հաղորդեն ՀՀ նախագահի աշխատակազմի հասարակայնութեան եւ տեղեկատուութեան միջոցներու հետ կապերու վարչութենէն:

Տարբերանշանը շրջանաձեւ է: Տարբերանշանին կեդրոնին Խոր Վիրապի վանքի եւ բիբլիական Արարատ լերան պատկերն է: Ս. Գրիգոր Լուսաւորիչը շուրջ 14 տարի բանտարկուած եղած է Արտաշատի վիրապին մէջ, որուն վրայ յետագային կառուցուած է վանքը: Այնուհետ Սուրբ Գրիգորը դարձաւ հայոց ազգի առաջին Հայրապետը, եւ Տրդատ Գ Մեծ թագաւորի հետ համատեղ ջանքերով քրիստոնէութիւնը Հայաստանի մէջ հռչակուեցաւ պետական կրօն:

Տարբերանշանի գոյներն են մանուշակագոյնը եւ դեղինը, որոնք կ՛արտացոլեն Հայաստանեայց Առաքելական Սուրբ Եկեղեցւոյ եւ Հռոմի Կաթողիկէ Եկեղեցւոյ պաշտօնական գոյները: Տարբերանշանին մէջ նաեւ ներառուած են երկու եկեղեցիներու զինանշանները:

Շրջանակի երկայնքով գրութիւնը կ՛արտացոլէ բուն այցը` «Ֆրանցիսկոս Պապ. Հայաստան. 24-26 Յունիս, 2016»: