Այս քարտերու բաշխումը սովորական աւանդութիւն դարձած էր հալէպահայութեան համար, յատկապէս իր հայաշունչ դրոշմով: Քարտերը անհրաժեշտ էր նկարազարդուած ըլլար, շնորհաւորական խօսքեր գրուէր տուեալ միութեան անունով եւ ինչպէս նաեւ խօսք եւ պատգամներ յղել հանրութեան:
Վերոնշեալ քարտերը ընդհանրապէս կը պատրաստուէին Հալէպի մէջ եւ ամէն մէկ միութիւն իր մասնաճիւղերուն կ՛ուղղարկէր Սուրիոյ տարածքին: Անշուշտ վերջինները ամէն մէկը իր կարգին ունէր բաշխումի յատուկ եղանակ: Իսկ Հալէպի համար Ս. Ծննդեան եւ Ս. Յարութեան օրերու անբաժան մասն էր քարտը իր իւրայատուկ բաշխումի եղանակով նոյնիսկ:
Միութիւններու կողմէ հրաւիրուած պարման-պարմանուհիներ, առաւօտեան ժամերէն սկսեալ խումբ առ խումբ կը շրջագայէին Հալէպի հայահոծ թաղամասերը եւ հայկական բնակարաններու դռները կը զանգէին: Տանտիրոջ կողմէ դուռը բացուելէ եւ շնորհաւորական խօսքերէ ետք՝ «Քրիստոս ծնաւ եւ յայտնեցաւ» կամ «Քրիստոս յարեաւ ի մեռելոց», համեստ գումար մը կը յանձնուէր տուեալ միութեան պարման-պարմանուհիներուն փոխան ստացագրի:
Այս աւանդական բարի սովորութիւնը Սուրիոյ պատերազմի պատճառով դժբախտաբար կանգ առած էր, սակայն այս տարի կիրակի, 27 մարտ 2016-ին, առաւօտեան ժամը 10:00-ին, Ս. Յարութեան տօնին առիթով, ՀՄԸՄ-ի եւ Սուրիահայ Պատանեկան Միութեան, վերականգնեցաւ քարտաբաշխումը, բայց ոչ աւանդական մեր հասկացողութեամբ, այլ Ս. Գրիգոր Լուսաւորիչ եւ Ս. Աստուածածին եկեղեցիներուն, մուտքին՝ Պատանեկան միութեան անդամներ եւ ՀՄԸՄ-ի տարազաւոր քոյր եւ եղբայրներու միջոցաւ:

Այս մասին կը յայտնէ PERIO NEWS.