Տիգրանակերտի պատմական հայկական Սուրբ Կիրակոս եկեղեցին, որ վերաբացուած էր 2011-ին,  վերջին ամիսներուն թուրք-քրտական բախումներուն հետեւանքով վնասուած է:

Ինչպէս NEWS.am-ին յայտնեցին Տիգրանակերտի բնակիչները, Տիգրանակերտի Սուրի շրջանին մէջ գտնուող հայկական Սուրբ Կիրակոս եկեղեցին վերջին 2 ամիսը փակուած է:

Բախումներու հետեւանքով կոտրուած են եկեղեցւոյ պատուհանները, եկեղեցւոյ պատերուն կ’երեւին կրակած փամփուշտներու տեղերը:

Բնակիչներուն խօսքով` վերջին օրերուն թրքական զինուժին կողմէ բուռն կրակոցներէն ետք դեռ յայտնի չէ ինչ վիճակի մէջ յայտնուած է Սուրբ Կիրակոսը, քանի որ Սուրի շրջանին մէջ կը շարունակուի փողոց դուրս գալու արգելքը:

Նշենք, որ Մերձաւոր Արեւելքի ամենամեծ եկեղեցիներէն մէկուն` Սուրբ Կիրակոսի վերաբացումն ու օծումը տեղի ունեցած է 2011-ի Հոկտեմբեր 22-ին, իսկ առաջին պատարագը մէկ օր անց` Հոկտեմբեր 23-ին:

Սուրբ Կիրակոսի վերանորոգումը իրականացուած է տիգրանակերտցի հայերու եւ Տիգրանակերտի  քաղաքապետարանի աջակցութեամբ:

Սուրբ Կիրակոսը վերաբացուած է որպէս գործող եկեղեցի: