Արցախի Հանրապետութեան վարչապետ Արայիկ Յարութիւնեան Նոյեմբեր 23-ին այցելած է Լոս Անճելըսի մէջ գործող հայկական վարժարաններ, ինչպէս նաեւ հանդիպում  ունեցած   խումբ մը բարերարներու հետ:

Ա. Յարութիւնեան այցելած է Սրբոց Նահատակաց Ֆերահեան Երկրորդական եւ ՀԲԸՄ Մանուկեան-Տեմիրճեան վարժարանները, ծանօթացած կրթօճախներու պայմաններուն եւ պատմութեան: Վարչապետը ներկայ գտնուած է աշակերտներուն կողմէ կազմակերպուած ձեռնարկներուն` բարձր գնահատելով վարժարաններու դերակատարութիւնը սփիւռքի մէջ հայապահպանութեան գործին:

Վարչապետ Յարութիւնեան այնուհետեւ Հայ Առաքելական եկեղեցւոյ ԱՄՆ Արեւմտեան ափի առաջնորդարանին մէջ կազմակերպուած ընդունելութեան ժամանակ հանդիպած է  խումբ մը բարերարներու, անոնց ներկայացուցած Արցախի զարգացման հեռանկարներն ու պայմանները: Ան  ներկաներուն հետ քննարկած է համագործակցութեան հնարաւորութիւնները, ձեռք բերած  պայմանաւորուածութիւններ:

Հանդիպման աւարտին վարչապետը յորդորած է բարերարներուն աշխուժօրէն աջակցիլ Նոյեմբեր 26-ին նախատեսուած հեռուստամարաթօնին, որուն ժամանակ հաւաքագրուած գումարները «Հայաստան» համահայկական հիմնադրամի միջոցով պիտի ուղղուին հայրենիքի զարգացման գործին: