«Գոհար» սիմֆոնիկ նուագախումբն ու երգչախումբը Հայոց Ցեղասպանութեան 100-­րդ տարելիցին նուիրուած համերգային ծրագիրով հանդէս պիտի գայ Պէյրութի մէջ:

Հոկտեմբեր 29-Նոյեմբեր 1 չորս համերգներու ընթացքին սիմֆոնիկ նուագախումբը եւ երգչախումբը պիտի հնչեցնեն խորհրդանշական 100 ստեղծագործութիւն: Ըստ Armenpress.am-ի՝ «Գոհար» սիմֆոնիկ նուագախումբի եւ երգչախումբի գեղարուեստական ղեկավար Գրիգոր Կուզիկեան նշած է, թէ համերգներու ընթացքին պիտի հնչեն ազգային, հայրենասիրական, ժոողովրդական եւ ռազմաշունչ երգեր. Մէկ խօսքով «Գոհար»­-ը պիտի ներկայացնէ բոլոր ժամանակներու գոհարները:

Պիտի կատարուին հին ու նոր երգեր` «Գոհար»-­ի մեկնաբանութեամբ ու գործիքաւորումով: Ի դէպ, խումբը պիտի ներկայանայ բաւական մեծ կազմով` նուագախումբի, պարախումբի ու երգչախումբի 150 մասնակից, 16 մենակատար եւ օժանդակ անձնակազմը: Ինչպէս միշտ, այս անգամ եւս «Գոհար»­-ը մեծ ոգեւորութեամբ պատրաստուած է յառաջիկային կայանալիք համերգներուն:

«Համերգը աննախադէպ պիտի ըլլայ: Ոչ միայն համերգային ծրագիրն է յատուկ ու շատ մանրամասն ընտրուած, այլ նաեւ ճարտարագիտական առումով անիկա եզակի պիտի ըլլայ, գերհագեցած լուսային, ձայնային ու ճարտարագիտական հնարանքներով»,­- նշած է խումբի գեղարուեստական ղեկավարը` բացայայտելով «Գոհար»­-ի յաջողութեան երաշխիքը:

«Մենք մեր գործը կ՝ընենք, կ՝ընենք այնպէս, ինչպէս պէտք է` իւրաքանչիւր մանրուք հաշուի առնելով` յանուն Հայաստանի ու Սփիւռքի: Մեզի համար կարեւորը սերունդները հայեցի ոգիով դաստիարակելն է»,- աւելցուցած է Գրիգոր Կուզիկեան:

«Գոհար»-­ը վերջին տարիներուն համերգներով հանդէս եկած է տարբեր երկիրներու մէջ` Լիբանան, Կիպրոս, Ռուսաստան, Թուրքիա, Միացեալ Նահանգներ, Գանատա, Հարաւային Ամերիկա: