Սեպտեմբեր 3-էն Նոյեմբեր 1 Սթամպուլի մէջ կը գործէ  Հայոց ցեղասպանութեան թեմային նուիրուած  «Թոռներ» ցուցահանդէսը:  Ցուցահանդէսը  համակարգողը (կուրատոր) ծնունդով արժանթինահայ, ներկայիս պեռլինաբնակ  նկարչուհի Սիլվինա Տէր – Մկրտչեանն է: ermenihaber.am-ի փոխանցմամբ` թրքական «Bianet.org» կայքը լայն անդրադարձ  կատարած է ցուցահանդէսին, անոր ստեղծման պատմութեան, պատմական ու հոգեբանական կողմերուն ու նշանակութեան:

Ցուցահանդէսին մէջ տեղ  գտած են Մարիա Պետոյեանի, Մարտին Կարատաղեանի, Արման Թադեւոսեանի, Միքայէլ Օհանեանի, Աշոտ Աշոտի,  Թալին Պիւեովքքիւքչեան–Տէմիրճեանի, Անի Սէթեանի, Հերա Պիւեովքթաշչեանի, Մարիա Զոլամեանի, Արչի Գալենցի, Լինտա Կանճեանի  աշխատանքները:

Նշենք, որ Սիլվինա Տէր-Մկրտչեան կը սերի Հայոց ցեղասպանութեան  ընթացքին Անատոլիայէն Արժանթին տեղափոխուած  հայ ընտանիքէ մը: Պեռլինի մէջ բնակութիւն հաստատելէ յետոյ սկսած է զբաղիլ իր ընտանիքի պատմութեան, Անատոլիոյ հետ ունեցած կապերու հետազօտութեամբ,  սկսած է ուսումնասիրել օսմանեան ժամանակներու հայերու կենցաղը, նիստուկացը, մշակոյթը:

Այդ ուսումնասիրութիւնները իրենց արտացոլումը  գտած են անոր «Յուշամատեան» նախագիծին մէջ: Տէր-Մկրտչեան բազմիցս եղած է Սթամպուլի մէջ, կազմակերպած  երկու անհատական ցուցահանդէս եւ  շարք մը այլ մշակութային ձեռնարկներ, որոնց ընթացքին կուտակուած փորձն ու ստեղծուած արժէքները հիմք  հանդիսացած են նաեւ «Թոռներ» ցուցահանդէսի ստեղծման համար: