Օգոստոս 5-ին ՀՀ սփիւռքի նախարար Հրանոյշ Յակոբեան ընդունեց Վալանսի (Ֆրանսա) Հայ մշակոյթի տան ատենապետ Նազօ Ճինպաշեանը:

 Հիւրը նախարարին պատմեց վալանսահայ համայնքի, ինչպէս նաեւ Հայ մշակոյթի տան գործունէութեան մասին` նշելով, որ վալանսահայութիւնը գործուն մասնակցութիւն ունի քաղաքի հասարակական-մշակութային կեանքին մէջ: Քաղաքապետարանին մէջ կը պաշտօնավարէ 4 հայ: Կրթամշակութային ասպարէզէն ներս կարեւոր դերակատարում ունի Հայ մշակոյթի տունը` իր երգի, պարի, գործիքային խումբերով, որոնց մէջ ընդգրկուած է աւելի քան 200 հոգի: Մշակոյթի տան խումբերը աչքի կ’իյնան Վալանսի մշակութային բոլոր ձեռնարկներու ժամանակ:

 Նախարար Հրանոյշ Յակոբեան կարեւոր համարելով մշակութային դաստիարակութեան դերը հայապահպանութեան հարցին մէջ` բարձր գնահատեց Վալանսի Հայ մշակոյթի տան գործունէութիւնը եւ առաջարկեց յաջորդ տարուան ընթացքին իբրեւ  խրախուսանք ապահովել խումբերու մասնակցութիւնը «Իմ Հայաստան» փառատօնին եւ նախարարութեան միւս ծրագիրներուն:

 Անդրադարձ եղաւ Հայոց ցեղասպանութեան 100-րդ տարելիցին նուիրուած Վալանսի համայնքի ձեռնարկներուն: Նազօ Ճինպաշեան տեղեկացուց, որ դեռեւս կը շարունակուին ձեռնարկները եւ ամենահետաքրքիրներէն մէկը կ’իրականացուի Նոյեմբեր ամսուն: Նախատեսուած է քաղաքային պուրակներէն մէկուն մէջ ի յիշատակ ցեղասպանութեան զոհերու` տնկել 100 ձիթենի: Պուրակը կ’անուանակոչուի Թալին, քանի որ Վալանսն ու Թալինը քոյր քաղաքներ են:

 Քննարկուեցան նաեւ Վալանսի մէջ հաստատուած սուրիահայութեան առնչուող հարցեր: Նախարարը յորդորեց սուրիահայութեան աշխուժօրէն ընդգրկել համայնքային գործունէութեան մէջ եւ ամէն կերպ հոգեկան նեցուկ կանգնիլ անոնց: