Հովանաւորութեամբ Հայաստանի Հանրապետութեան սփիւռքի նախարարութեան Եւ կազմակերպութեամբ Համազգայինի Արեւմտեան Ամերիկայի Շրջանային վարչութեան, Նունէ Եսայեանի մենահամերգը տեղի պիտի ունենայ Սեպտեմբեր 27, 2015ին, Փասատինայի «Ամպասատոր» շքեղ թատերասրահէն ներս, մասնակցութեամբ Համազգայինի «Անի» պարախումբին:

Արդարեւ, Համազգայինի Արեւմտէան Ամերիկայի Շրջանային վարչութիւնը մեծ ցնծութեամբ կը ծանուցէ մեր երաժշտասէր հասարակութեան, որ վերջին երկուքուկէս տասնամեակներուն, հայ երգարուեստի անդաստանէն ներս իր ուրոյն տեղն ու կշիռը վայելող երգչուհի Նունէ Եսայեան համերգային շրջապտոյտ մը պիտի կատարէ Ամերիկայի Արեւելեան եւ Արեւմտեան ափերու եւ Գանատայի հայահոծ գաղութներէն ներս, ընկերակցութեամբ իր նուագախումբին:

Տարբեր առիթներով այս գաղութէն ներս ելոյթ ունեցած Նունէն, այս անգամ հանդէս պիտի գայ բոլորովին նոր յայտագիրով մը, որ կենդանի պատկերներով ներկայացում մը պիտի ըլլայ հայոց պատմութեան փառապանծ էջերէն քաղուած դրուագներու: Իր արուեստագիտուհիի տաղանդին շնորհիւ հայ երգաշխարհը բազմիցս նուաճած Նունէն, երկար բացակայութենէ ետք պիտի այցելէ Լոս Անճելըսի հանդիսատեսին՝ յագեցնելու համար երաժշտական բարձրորակ ճաշակի տէր հասարակութիւնը:

Համազգայինի «Անի» պարախումբը մէջընդմէջ ելոյթ պիտի ունենայ՝ հրամցնելով իր պարային ընտրանիէն քանի մը նմոյշներ, այսպիսով հանդիսատեսին պարգեւելով վայելքի անփոխարինելի պահեր:

Համերգի տոմսերը արդէն իսկ հրապարակի վրայ են: Կրնաք ձեր տոմսերը ապահովել՝ այցելելով itsmyseat.com կայքը:

Համերգի հասոյթը պիտի յատկացուի սուրիահայութեան օժանդակութեան:

ՀԱՄԱԶԳԱՅԻՆԻ ԱՐԵՒՄՏ. ԱՄԵՐԻԿԱՅԻ ՇՐՋԱՆԱՅԻՆ ՎԱՐՉՈՒԹԻՒՆ