PRNet ընկերութիւնը վերլուծած է 2015 թուականի Ապրիլ 20-26 ինկած ժամանակահատուածին  թրքական լրատուամիջոցներուն մէջ ամենաշատ խօսուած նիւթերը:

Medyatava թրքական կայքի փոխանցմամբ, կը գրէ Արցախփրէսը, պարզուած է, որ Հայոց ցեղասպանութեան մասին աւելի շատ հրապարակումներ  եղած են, քան Չանաքքալէի ձեռնարկներուն:

Յառաջատար հնգեակը գլխաւորած են Ապրիլ 23-ին նշուող Երեխաներու օրուան մասին նիւթերը, որուն նուիրուած 6.728 նիւթ  եղած է:

Հայոց ցեղասպանութեան մասին նիւթերը երկրորդը եղած են: Ցեղասպանութեան 100-րդ տարելիցին մասին գրուած է 2.404 անգամ:

Չանաքքալէի յաղթանակի 100-ամեակը յիշատակուած է 2.036 նիւթի մէջ:

Ատոր յաջորդած են Թուրքիոյ մէջ կայանալիք խորհրդարանական ընտրութիւններէն առաջ քաղաքական նիւթերը:

Նշուած ժամանակահատուածին լրատուամիջոցները ամէնէն շատ անդրադարձած են Թուրքիոյ նախագահ Ռեճէպ Թայիպ Էրտողանին: Անոր անունը յիշատակուած է մօտ 4.000 հրապարակման մէջ:

Երկրորդը եղած է վարչապետ Ահմեթ Դաւութօղլուն, իսկ երրորդը` ընդդիմադիր գործիչ, Ժողովրդահանրապետական կուսակցութեան նախագահ Քեմալ Քըլըչդարօղլուն: