ՀՕՄ -ի Հայաստանի Շրջանային վարչութենէն «Հայերն այսօրին» կը տեղեկացնեն, որ Հայոց ցեղասպանութեան 100-րդ տարելիցի ծիրէն ներս ՀՕՄ -ի Հայաստանի Շրջանային վարչութիւնը  շարք մը ձեռնարկներ  նախաձեռնած է:

Ապրիլ 22-ին, ժամը 19:00-ին, Համազգային թատրոնին մէջ տեղի կ’ունենայ Արմէն Սանթրոսեանի «Դալար շիւեր» ներկայացման անդրանիկ ցուցադրութիւնը, որ նուիրուած է Ցեղասպանութեան 100-րդ տարելիցին:

Ապրիլ 24-ին Կիեւեան կամուրջի յարակից տարածքէն երթ կը կազմակերպուի դէպի Ծիծեռնակաբերդ եւ ծաղկեպսակ կը դրուի` ի յիշատակ անմեղ նահատակներուն:

Շարունակելով ոգեկոչման ձեռնարկները` Ապրիլ 25-ին ՀՕՄ -ուհիները  կ’այցելեն Եռաբլուր (ծաղիկներ կը դնեն Սօսէ մայրիկի շիրիմին), Կոմիտասի անուան պանթէոն, Կոմիտասի անուան թանգարան-հիմնարկ եւ Հայ օգնութեան միութեան 100-ամեակին նուիրուած յուշարձանին:

Աւարտելով նախաձեռնած ձեռնարկներու շարքը` ՀՕՄ -ի Հայաստանի Շրջանային վարչութիւնը Ապրիլ 25-ին աշխարհասփիւռ ՀՕՄ-ուհիներու մասնակցութեամբ  ընթրիք-հանդիպում  կը կազմակերպէ:

Յիշեցնենք, որ Ապրիլ 16-ին ՀՕՄ -ի Հայաստանի Շրջանային վարչութիւնը «Փոքրիկ Իշխան» կրթահամալիրին հետ համատեղ կազմակերպած  էր «Կը յիշեմ եւ կը պահանջեմ» խորագիրով ձեռնարկ–վարդատունկ, որուն ընթացքին  Կրթահամալիրի սաները խորհրդանշական 100 վարդ  ցանած են:

Իսկ Ապրիլ 17-ին ՀՀ Սփիւռքի նախարարութեան հետ համատեղ կեանքի կոչուեցաւ  «Հայ կնոջ դերը ցեղասպանութեան տարիներուն եւ անկէ յետոյ» թեմայով  գիտաժողովը: