Թուրքիոյ վարչապետ Ահմէթ Տաւութօղլուն թրքական «Kanal 24» հեռուստաալիքի եթերով անդրադարձած է հայկական թեմային առնչուող  շարք մը հարցերու, կը գրէ ermenihaber.am-ը:

Առաջնահերթ տեղեկացուցած է, որ թրքական իշխանութիւնները կը ծրագրեն Ապրիլ 24-ին Պոլսոյ հայոց պատրիարքարանին մէջ տեղի ունենալիք կրօնական արարողութեան մասնակցութիւն ունենալ նախարարի մակարդակով:

Նշելով Հայաստանի հզօրացման հայկական սփիւռքի խանգարիչ գործօն ըլլալու մասին անհեթեթութիւններ` Թուրքիոյ վարչապետը, այնուամենայնիւ, խոստովանած է, որ սփիւռքահայութիւնը բաւականին զօրեղ ուժ է: Հայոց ցեղասպանութեան ճանաչման եւ դատապարտման բանաձեւ ընդունած երկիրներու վերաբերեալ Տաւութօղլուն ըսած է, թէ այդ որոշումները գործնական կիրառութիւն չեն կրնան ունենալ:

Իր արդէն նախկին գլխաւոր խորհրդական Էթյէն Մահչուփեանի մասին Թուրքիոյ կառավարութեան ղեկավարը դրական  արտայայտուած է` բնութագրելով անոր իբրեւ շատ զարգացած անձնաւորութիւն: Պաշտօնաթողութիւնը պայմանաւորած է կենսաթոշակային տարիքի հասնելու հետ:

Տաւութօղլուն նաեւ յիշեցուցած է, որ յառաջիկայ խորհրդարանական ընտութիւններուն իշխող «Արդարութիւն եւ զարգացում» կուսակցութեան (ԱԶԿ-AKP) նախընտրական ցուցակին մէջ ընդգրկուած է նաեւ ազգութեամբ հայ
թեկնածու: Ուշադրութիւն  հրաւիրած է այն փաստի վրայ, որ ԱԶԿ-ի կողմէ հայ թեկնածուի առաջադրումէն յետոյ ընդդիմադիր կուսակցութիւնները եւս պատգամաւորի հայ թեկնածուներ առաջադրեցին: