Մայիս 19-ին ՀՀ սփիւռքի նախարարի պաշտօնակատար Հրանոյշ Յակոբեան ընդունեց Իտալիոյ Պոլոնիա քաղաքի համալսարանի արեւելագիտութեան բաժանմունքի փրոֆէսոր, «Հայաստան» համահայկական հիմնադրամի Իտալիոյ տեղական մարմնի նախագահ Պայքար Սվազլեանը:

Ջերմօրէն ողջունելով հիւրը` Հրանոյշ Յակոբեան իր գոհունակութիւնը յայտնեց իտալահայ հայագէտին եւ հասարակական գործիչին կողմէ իրականացուող ազգանպաստ գործունէութեան վերաբերեալ:

Քննարկուեցաւ տարբեր երկիրներու մէջ գործող հայագիտական կեդրոններու համագործակցութեան, անոնց կողմէ իրականացուող ծրագիրներու համակարգման հարցը:

Շնորհակալութիւն յայտնելով ջերմ ընդունելութեան համար` Պայքար Սվազլեան   կարեւոր համարեց Սփիւռքի նախարարութեան հետ հայագիտական կեդրոններու աշխոյժ համագործակցութիւնը: Ան հաւաստիացուց, որ յառաջիկային առաւել աշխոյժ ու արդիւնաւէտ կ’ըլլան Իտալիոյ հայ համայնքի ներուժը Հայաստանի զարգացման գործին ներգրաւելու անոնց ջանքերը:

Պայքար Սվազլեան անդրադարձաւ վերջերս Իտալիոյ խորհրդարանին մէջ Հայաստանի եւ Իտալիոյ միջեւ դիւանագիտական յարաբերութիւններու հաստատման 25-ամեակին նուիուած ձեռարկին, որ կազմակերպած էր Իտալիոյ Հանրապետութեան մէջ ՀՀ դեսպանատունը:

Պարոն Սվազլեան տեղեկացուց նաեւ Իտալիոյ տարբեր քաղաքներու մէջ շարունակուող Հայոց ցեղասպանութեան ճանաչման յաղթարշաւի մասին եւ ընդգծեց, որ Թուրքիոյ դեսպանութիւնը կը փորձէ լռեցնել տեղական իշխանութիւնները տարբեր սպառնալիքներով: Ատոր հետ կապուած Պայքար Սվազլեան աւելցուց, որ Իտալիոյ Սենատի անդամ Ալտօ տի Պիաջիոն խորհրդարանին մէջ

 հարց  մը բարձրացուցած է` պահանջելով վարչապետէն եւ Արտաքին գործոց նախարարէն, որպէսզի անոնք վերջ դնեն Թուրքիոյ դեսպանին կողմէ Իտալիոյ ներքին գործերուն խառնուելու եւ համայնքային խնդիրներուն միջամտելու գործողութիւններուն:

Քննարկուեցան երկկողմ հետաքրքրութիւն ներկայացնող շարք մը այլ հարցեր: