Ղազախստանի հայկական համայնքն այս օրերին ապրում է հայաշունչ աշխույժ առօրյայով, ինչը հիմնականում պայմանավորված է Ղազախստանում ՀՀ դեսպան Արա Սահակյանի՝ հա­մայնքային խնդիրների նկատմամբ ցուցաբերած ուշադրությամբ, հայկական կրթամշա­կութային կառույցների, այդ թվում՝ Ղազախստանի հայկական  երիտասարդական հիմնա­դրամի հայանպաստ գործունեությամբ, Հայրենիքից հեռու հայ մնալու նրանց ազգանվեր մղումով։ Ամեն նոր բացվող օր իր հետ նոր միջոցառում և նոր ձեռնարկ է բերում։

Մարտի 13-ին Աստանայում կազմակերպվել է Ս. Փարաջանովին նվիրված դասախոսություն, ապա ցուցադրվել է «Նռան գույնը» ֆիլմը։

Մարտի 20-ին Ալմաթիում մեկնարկեց Մանկական ստեղծագործության 4-րդ միջազգային փառատոնը, իսկ երկու օր անց՝ մարտի 22-ին, հայտնի դարձավ, որ Ալմաթիի հայկական երգի-պարի «Նաիրի» համախումբն արժանացել է գլխավոր մրցանակի։

Մարտի 24-ին Ալմաթիի Հայկական տանը («Լույս» ՀՄԿ) տեղի է ունեցել համայնքի անդամ­ների հանդիպումը դեսպան Արա Սահակյանի հետ։ Քննարկվել են «Հայաստան-Սփյուռք» գործակցությանն առնչվող հարցեր, համայնքի առաջիկա ծրագրերը։

Մարտի 27-ից Ղազախստանի Աստանա, Ալմաթի, Կոստանայ, Ակտաու քաղաքներում կազմակերպվելու է Հայոց ցեղասպանության թեմաներով ֆիլմերի ցուցադրություն։

Ապրիլի 3-ին Բիշքեկում Պատվո հյուպատոս Պետրոս Շահինյանի և հայկական համայնքի ղեկավար Աշոտ Ղոնդախչյանի նախաձեռնությամբ կազմակերպվելու է Հայոց ցեղասպանության թեմայով կլոր սեղան, որին մասնակցելու և ելույթ է ունենալու նաև դեսպան Ա. Սահակյանը։

Ապրիլի 4-ին Ղազախստանի Պավլոդար քաղաքում մեծ հանդիսությամբ նշվելու է «Հայրենիք» հայկական մշակութային կենտրոնի կազմավորման 20-ամյակը, որին մասնակցելու են Ղազախստանի տարբեր մարզերի հայկական կառույցների ներկայացուցիչներ։

Ապրիլի 7-ին՝ Մայրության, գեղեցկության եւ սիրո տոնին Աստանայի և Ակլոմային մարզի հայկական համայնքը նախատեսում է այցելություն նախկին կանանց գաղութի տարածքում ստեղծված հուշահամալիր:

Ապրիլի 24-ին Ղազախստանի Ակտաու եւ Ղրղզստանի Բիշքեկ քաղաքներում հանդիսավորությամբ կտեղադրվեն խաչքարեր:

Այսպիսին է մարտի երկրորդ տասնօրյակում կազմակերպված և առաջիկայում նախատեսված համայնքային միջոցառումների ոչ լրիվ ցանկը։ Հայկական համայնքն ապրում է հետաքրքիր և լիարյուն կյանքով։