Մարտի 23-ին նախարար Հրանուշ Հակոբյանն այցելեց Սիդնեյի Սուրբ Հարություն եկեղեցի, հանդիպեց Ավստրալիայի և Նոր Զելանդիայի հայոց թեմի առաջնորդ Հայկազուն եպիսկոպոս Նաջարյանի և թեմական ժողովի անդամների հետ:

Ողջունելով նախարարին՝ Սրբազանը  բարձր գնահատեց ՀՀ սփյուռքի նախարարության կատարած աշխատանքները Հայաստան-սփյուռք կապերի ամրապնդման գործում:

Հրանուշ Հակոբյանը  շորհակալություն հայտնեց ջերմ ընդունելության համար և ներկայացրեց նախարարության ծրագրերը՝ կարևորելով հայոց լեզվի և ազգային ինքնության  պահպանման ուղղությամբ տարվող աշխատանքները:

Ներկաներն իրենց գոհունակությունը հայտնեցին նախարարության կողմից իրականացվող Ավստրալիայի հայ համայնքի կրթամշակութային աջակցության ծրագրի արդյունավետ իրականացման վերաբերյալ: Նրանք բարձր գնահատեցին հայապահպանությանն ուղղված նախարարության ջանքերը և հատկապես «Արի տուն» ծրագիրը:

 Հանդիպման ընթացքում նախարարը պատասխանել է ներկաներին հետաքրքրող բազմաթիվ հարցերի, որոնք վերաբերել են Հայրենիք-Սփյուռք գործակցությանը, ավստրալահայ համայնքի մասնակցությանը նախարարության ծրագրերին, Ցեղասպանության 100-րդ տարելիցի ոգեկոչման միջոցառումներին, ինչպես նաև Հայաստանի ներկա տնտեսական իրավիճակին:

 Այնուհետև, նախարարը հանդիպել է համայնքի մի շարք գործարարների և նրանց ներկայացրել Հայաստանում գործարար կապերի ընդլայնման և տնտեսական համագործակցության հնարավորությունները,  Հայրենիքում ներդրումներ կատարելու, ինչպես նաև իրենց հանգիստն անցկացնելու առավելությունները: Ներկայացրել է նաև զբոսաշրջության զարգացման հեռանկարները և քաջալերել ներդրումներ կատարել այդ ոլորտում:

Հանդիպումից հետո նախարարն այցելել է Ռայդ քաղաքի RRYDE-EASTWOOD LEAGUES CLUBY, որտեղ ներկա է գտնվել Համազգայինի «Նայիրի» և ՀՄԸՄ «Արարատ» միությունների կազմակերպած երեկոյին:

 Մի շարք կատարումներով հանդես են եկել Զարուհի Բաբայանը և Համլետ Գևորգյանը: