«Դիլիջան» կամերային երաժշտության համերգաշարի շրջանակում Լոս Անջելեսում հունվարի 18­ին տեղի են ունեցել երկու համաշխարհային պրեմիերաներ. «Գրեմմի» մրցանակի դափնեկիր, հանրաճանաչ ալտահար Քիմ Քաշքաշյանը ներկայացրել է Տիգրան Մանսուրյանի և Արթուր Ավանեսովի ստեղծագործությունները:

«Արմենպրես»­ի փոխանցմամբ՝ երեկոյին մասնակցել են նաև ջութակահարներ Վարդի Մանուելյանը և Մովսես Պողոսյանը, ալտահար Խուան Միգել Հերնանդեզը և թավջութակահար Կարեն Ուզունյանը:

Հնչել են Տիգրան Մանսուրյանի «Պարուհիներ» դուետը ջութակի և ալտի համար (համաշխարհային պրեմիերա), Արթուր Ավանեսովի «Je Ne Regrette Rien» (ամերիկյան պրեմիերա), ընտրյալ հատվածներ «Feux Follets» շարքից (համաշխարհային պրեմիերա), ինչպես նաև Էնեսկուի Ջութակի սոնատ թիվ 3­ը և Մենդելսոնի Լարային կվինտետը:

«Դիլիջան» փառատոնի տասներորդ համերգաշրջանը նվիրված է Հայոց ցեղասպանության 100­-ամյա տարելիցին: Հոբելյանական փառատոնին մասնակցում են բազմաթիվ հայտնի մենակատարներ:

«Լարք» երաժշտական ընկերակցության անդամների կողմից 2005 թվականին հիմնված «Դիլիջան» կամերային երաժշտության համերգաշարի ստեղծման նպատակն է հայկական դասական երաժշտությունը ներկայացնել միջազգային հանրությանը: «Դիլիջանի» համերգներն անցկացվում են Լոս Անջելեսի «Զիփեր» համերգային կենտրոնի «Քոլբըրն» սրահում, որը համարվում է քաղաքի կամերային երաժշտության լավագույն համերգասրահը: