Ինչպես «Հայերն այսօր»-ին տեղեկացնում են Մոսկվայում ՀՀ դեսպանությունից, փետրվարի 6-ին Մոսկվայի Գրականագետների կենտրոնական տանը տեղի է ունեցել հայ մեծանուն բանաստեղծ Պարույր Սևակի 90-ամյակին նվիրված հուշ երեկո: Այն կազմակերպվել էր Գրողների միությունների միջազգային  ընկերակցության, Ռուսաստանի հայերի միության, Ռուսաստանի գրողների միության, Միջազգային գրականագիտական հիմնադրամի համատեղ ջանքերով:

Միջոցառմանը բացման խոսքով հանդես է եկել Գրողների միությունների միջազգային  ընկերակցության Գործադիր կոմիտեի նախագահ Ի. Պերեվերզինը:

Երեկոն վարում էին Ռուսաստանի գրողների միության խորհրդի քարտուղար, ակադեմիկոս Ա. Օհանյանը  և ռուս անվանի բանաստեղծ,  Գրողների միությունների միջազգային  ընկերակցության գործադիր կոմիտեի առաջին քարտուղար Վ. Բոյարինովը:

Երեկոյի ընթացքում ընթերցվել են Պ.Սևակի բանաստեղծությունները հայերեն և  ռուսերեն: Վերջիններս՝  հենց Սևակի պոեզիայի ռուս թարգմանիչներ Ս.Կունյաևի, Վ.Միկուշևիչի և այլոց կողմից, հնչել են Կոմիտասի, Սայաթ-Նովայի, Ա. Բաբաջանյանի ստեղծագործությունների կատարումները:

Հանդիպմանը ներկա է եղել Մոսկվայում ՀՀ դեսպանության երկրորդ քարտուղար Վիկտորյա Մելքումովան, ով ընթերցել է ՌԴ-ում ՀՀ արտակարգ և լիազոր դեսպան Օ.Եսայանի ողջույնի ուղերձը:

Պ. Սևակի ծննդյան 90-ամյակի կապակցությամբ «Литературная газета» թերթի N 1 (50),2014 համարում լույս է տեսել մեծանուն բանաստեղծին նվիրված ընդարձակ  հոդված: