Հունվարի 24-ին տեղի ունեցավ ՀՀ սփյուռքի նախարարի մամուլի ասուլիսը 2013թ. գործունեության և 2014թ. ծրագրերի վերաբերյալ: ՀՀ սփյուռքի նախարար Հրանուշ Հակոբյանը ներկայացրեց ՀՀ  նախագահի  կողմից  նախարարության առջև  դրված ռազմավարական  խնդիրների լուծման ուղղությամբ գերատեսչության իրականացրած ծրագրերն ու միջոցառումները և 2014թ. գերակա խնդիրները:

«Մեր բոլոր ծրագրերն իրականացրել ենք Սփյուռքի հետ խորհրդակցելով, նրա աջակցությամբ: Եթե չլիներ Սփյուռքի մասնակցությունը, մեր ծրագրերն իրականություն չէին դառնա».- ասաց նախարարը և գոհունակությամբ նշեց, որ ՀՀ սփյուռքի նախարարության գոյության 5 տարիների ընթացքում ավելացել է վստահությունը և ծրագրերի մասնակիցների թիվը:

Նախարարն ընդգծեց, որ 2013թ ՀՀ սփյուռքի նախարարության գործունեությունն ուղղված է եղել երեք ռազմավարական խնդիրների լուծմանը՝ նպաստել  հայապահպանությանը Սփյուռքում, հայկական  ներուժի  հայտնաբերմանն  ու համախմբմանը և իրականացնել հայրենադարձությունը  խթանող  ծրագրեր:

Հրանուշ Հակոբյանը կարևորեց այն հանգամանքը, որ Սփյուռքը շատ տարողունակ հասկացություն է՝ բազմակարծիք, բազմալեզու, բազմակրոն: 7 միլիոն հայ է բնակվում աշխարհի 100 երկրում, գործում է 30 հազար հայկական կազմակերպություն, 18 համահայկական կառույց: Եվ բոլորին  հնարավոր է միավորել միայն համազգային առաջնահերթությունների շուրջ՝

v  Հայաստանի  Հանրապետության  զորացում  և  անվտանգության  ապահովում.

v  Լեռնային  Ղարաբաղի  Հանրապետության  հիմնախնդրի խաղաղ  կարգավորում.

v  Հայոց  ցեղասպանության  միջազգային  ճանաչում, դատապարտում  և  հետևանքների  վերացում.

v  Հայապահպանություն, Սփյուռքում  ուծացման  դեմ  պայքար.

v  Հայ  եկեղեցու  շուրջ  համախմբում:

Նախարար Հ. Հակոբյանը կարևորեց մայրենի լեզվի տարածումը և ներկայացրեց այդ ուղղությամբ կատարված աշխատանքները:

Հրանուշ Հակոբյանը գոհունակությամբ նշեց, որ «Սփյուռք» ամառային դպրոցի դասընթացներին 2013թ. մասնակցել է 240 սփյուռքահայ 17 երկրից: Դասընթացները կազմակերպվել են 5 ուղղությամբ՝ հայոց լեզվի արագացված դասընթաց,  ուսուցիչների վերապատրաստում,  ազգային երգի ու պարի դասընթացներ, սփյուռքահայ երիտասարդ առաջնորդների ամառային դպրոց, սփյուռքահայ լրագրողների ամառային դպրոց:  ՀՀ սփյուռքի նախարարությունը համագործակցել է  ՀՀ ԳԱԱ հետ, ՀՀ գիտությունների ազգային ակադեմիայի 6 ինստիտուտներում բացվել են Սփյուռքի բաժիններ:

Նախարարը կարևորեց սփյուռքագիտության ոլորտում կադրերի պատրաստման հարցը և նշեց, որ 2008թ. Երևանի պետական համալսարանի Բանասիրության ֆակուլտետում ստեղծված Սփյուռքագիտության ամբիոնը պատրաստել է 39 սփյուռքագետ-մագիստրոսներ, այսօր սովորում են 24-ը:

Նախարարը ներկայացրեց 2013թ ՀՀ սփյուռքի նախարարության պատվերով
Սփյուռքի  հիմնախնդիրների  վերաբերյալ հրատարակված  գրքերը և գոհունակությամբ նշեց, որ հինգ տարվա ընթացքում տպագրվել է 95 սփյուռքագիտական հետազոտություն:

Նախարարի խոսքով` Սփյուռքի յուրօրինակ հանրագիտարան է ամեն տարի հրատարակվող Տարեգիրքը, որն իր կառուցվածքով և նյութերի ընդգրկմամբ հավակնում է դառնալու սկզբնաղբյուր հայ սփյուռքի պատմությունն ուսումնասիրողների համար: Տարեգրքում ներկայացված են ՀՀ գերատեսչությունների, հոգևոր կառույցների, համահայկական կազմակերպությունների՝ Հայաստան-Սփյուռք գործակցության ոլորտում իրականացրած միջոցառումները և այլ նյութեր:

Արդեն ավանդական դարձած «Արի տուն» երիտասարդների հայրենաճանաչության ծրագրին 2013թ մասնակցել է 924 սփյուռքահայ երիտասարդ աշխարհի 36 երկրից:

Նախարարը մասնավորապես նշեց, որ «Արի տուն» ծրագիրը ոչ թե հայրենադարձության, այլ հայրենաճանաչության ծրագիր է: Այն նպաստում է սփյուռքահայ երիտասարդների՝ իրենց հայրենիքը փաստացի ճանաչելուն: Ծրագրի իրականացման շնորհիվ շուրջ 10.000 ընտանիքներ՝ մոտ 50.000 մարդ Հայրենիքից և Սփյուռքից այսօր շփվում են միմյանց հետ:

Նախարարության ռազմավարական խնդիրների լուծման գործում նախարարը կարևորեց համահայկական մասնագիտական համաժողովների անցկացումը:

Նա նշեց, որ 2013թ անցկացվել է 9 համաժողով՝ «Հայկական  ինքնության  խնդիրները  21-րդ դարում»  և «Արդի  լեզվաքաղաքականության  հիմնախնդիրները»  խորագրով  գիտաժողովներ, «Հայերենն  իմ  սրտում  է»  համահայկական  երիտասարդական  ֆորում,  Օտարագիր  հայ  գրողների   հինգերորդ  համաժողով, Իրավաբանների  համահայկական  երկրորդ  համաժողով, «Հայոց ցեղասպանության 100-րդ տարելիցին ընդառաջ»  Հայկական  հիմնախնդիրների  իրազեկման  կառույցների  ներկայացուցիչների հավաք-հանդիպում, ԱՊՀ  համայնքների  ղեկավարների  հավաք, Սրտաբանների  եվրակովկասյան համաժողով,  Բանկիրների և ֆինանսիստների համահայկական երկրորդ, «Հարափոփոխ աշխարհ, փոփոխվող սփյուռք» խորագրով համաժողովներ:

Հրանուշ Հակոբյանը նախանշեց 2014թ կազմակերպվելիք համաժողովները, այդ թվում՝ «Հայաստան-Սփյուռք» 5-րդ համահայկական, Հայ կանանց համահայկական, Լրագրողների համահայկական 7-րդ, Գրողների համահայկական համաժողովները, Ցեղասպանության 100-րդ տարելիցին ընդառաջ տարածաշրջանային հանձնաժողովների ներկայացուցիչների հավաք: Ընդհանուր առմամբ 5 տարվա ընթացքում անցկացվել է 51 համաժողով:

Նախարարը կարևորեց նաև մշակութային միջոցառումները. «Մշակույթը ազգերի անձնագիրն է, մշակույթի միջոցով է ազգը վերադառնում արմատներին», – ասաց նախարարը: 2013թ. ՀՀ սփյուռքի նախարարության նախաձեռնությամբ կազմակերպված «Կոմիտաս Վարդապետ»  համահայկական փառատոնին (սեպտեմբերի 26 -հոկտեմբերի 3)  մասնակցել է շուրջ 500 հոգի Ճապոնիայից, Գերմանիայից, ԱՄՆ-ից, Մերձավոր և Միջին Արևելքի և մի շարք այլ երկրներից:

Խոսելով «Մեր մեծերը» ծրագրի մասին՝ նախարարը նշեց, որ  2013թ.  նվիրված էր  հայ մեծանուն գործիչներին  (Արշակ Չոպանյան, Գևորգ  Զ  Չորեքչյան, Վիլյամ Սարոյան)  և Շախմատի Հայաստանի հավաքականին:

2014թ. Մեր մեծեր են հռչակվել Կոմիտասը, Հ. Թումանյանը, Սիամանթոն, Ա. Գորկին, Գ. Գյուլբենկյանը:

ՀՀ սփյուռքի նախարարը ներկայացրեց սիրիահայերի սոցիալական, առողջապահական, բնակարանային, աշխատանքային, կրթական հիմնախնդիրների լուծման ուղղությամբ կատարված աշխատանքները, «Սիրիահայերի հիմնախնդիրները համակարգող կենտրոն» ՀԿ-ի հետ նախարարության համագործակցությունը:

Ներկայացնելով նախարարության 2014թ. ծրագրերը՝ Հրանուշ Հակոբյանը նշեց, որ ընթացիկ տարում շարունակվելու և ընդլայնվելու է համագործակցությունը համահայկական կառույցների հետ: «Առավել կակտիվանան և կընդլայնվեն Ցեղասպանության 100-րդ տարելիցին ընդառաջ իրականացվող աշխատանքները: Սփյուռքի համայնքներում արդեն գործում է 37 հանձնաժողով: Մայիսին Երևանում կանցկացվի «Հայոց ցեղասպանության 100-րդ տարելիցին ընդառաջ»  Հայկական  հիմնախնդիրների  իրազեկման  կառույցների  ներկայացուցիչների (լոբբիստների) հավաք-հանդիպում, որի արդյունքներով կկարողանանք ճշգրտել  2014 և 2015թթ. մեր հետագա քայլերը»,- նշեց նախարարը:

Վերջում ՀՀ սփյուռքի նախարարը պատասխանեց լրագրողների հարցերին: